«Толибон» ҳукумати вакиллари Twitter’да «кўк галочка» сотиб олишни бошлади

«Толибон» вакиллари Twitter’да пулли верификация хизматига рўйхатдан ўтишни бошлади — улардан баъзиларининг аккаунтларида «кўк галочка»лар пайдо бўлди.

Айни пайтда «Толибон»нинг икки расмийси ва Афғонистондаги ҳаракатнинг асосий тарафдорларидан тўрт нафари «галочка»лардан фойдаланмоқда, деб таъкидлайди BBC.

«Толибон»нинг «ахборотдан фойдаланиш» департаменти раҳбари Ҳидоятуллоҳ Ҳидоятда ҳозир верификация белгиси мавжуд. Унинг аккаунтида 187 000 обуначи бор ва у ерда «Толибон» ҳукумати ҳақида асосий маълумотлар жойлаштириб борилади.

Афғонистон Ахборот ва маданият вазирлигининг юқори мартабали ходими Абдул Ҳақ Ҳаммаднинг ҳам аккаунтида кўк белги бор. Унинг обуначилари 170 мингта.

Эслатиб ўтамиз, илгари «кўк галочка» Twitter томонидан тасдиқланган «фаол, эътиборга молик ва ҳақиқий жамоат манфаатига хизмат қилувчи аккаунтлар»га берилган ҳамда уларни сотиб олиш мумкин эмасди. Бироқ миллиардер Илон Маск ижтимоий тармоқни сотиб олганидан сўнг, энди исталган фойдаланувчи янги Twitter Blue хизмати орқали «галочка» харид қилиши мумкин.

Twitter Blue хизмати декабрь ойида ишга тушди. Унинг нархи ойига 8 доллар, Apple қурилмаларида Twitter’дан фойдаланадиганлар қўшимча 11 доллар тўлайди. Twitter Blue пайдо бўлишидан олдин «Толибон» расмий аккаунтларининг ҳеч бирида «кўк галочка» бўлмаган.

«Толибон» расмийлари ва тарафдорлари Twitter’нинг фаол фойдаланувчилари бўлиб, ушбу платформадан муҳим хабарларни тарқатиш учун фойдаланади.