Бухоро туризм маркази бошқа ерда аҳоли ва UNESCO билан келишган ҳолда қурилиши мумкин

Бухоро вилояти ҳокимлиги «Бухоро туризм маркази» аҳоли ва UNESCO билан келишган ҳолда бошқа ерда қурилиши бўйича маълумот берди.

Ҳозирда «Бухоро туризм маркази» лойиҳаси дастлабки босқичда тайёрланмоқда. Унинг лойиҳаси пухта ишлаб чиқилгандан сўнг тегишли тартибда барча келишувлардан ўтказилади. Лойиҳа бўйича кенг жамоатчилик ва фуқаролар фикри инобатга олиб, бошқа мақбул ер майдонлари танланади.

«Шунингдек, UNESCO умумжаҳон марказининг тегишли хулосаси олинган ҳолда, якуний қарор қабул қилинади ва шундан сўнг қурилиш ишлари бошланади», — дейди ҳокимлик матбуот хизмати.

13 январь куни бухороликлар марказ қурилишидан норози бўлиб, президентга мурожаат йўллаганди. Мурожаатда аҳоли Бухоро шаҳри қоқ марказида 2023 йилда туризм маркази қурилиши доирасида шаҳарнинг Иброҳим Мўминов ва Мустақиллик кўчалари ўқи атрофидаги барча бино ва иншоотлар, жумладан, катта спорт мажмуаси ҳам бузилишидан норозилик билдирган.

Марказ 33 гектар майдонда қурилиши, Бухоро вилояти бюджетидан 2023 йилда 517 миллиард сўм ажратилиши кўзда тутилгани хабар қилинган. Ҳолат юзасидан қурилиш ва уй-жой коммунал хўжалиги вазири Ботир Зокиров «Дарё» мухбирига берган қисқача интерюсида бунга изоҳ берган.

«Марказнинг лойиҳа таклифи бўлгач, жамоатчиликка муҳокама учун қўйилади. Бухоро шаҳрида аҳоли учун алоҳида тақдимот қилиб берилади. Айни вақтда ўрганиш ишлари олиб борилмоқда, холос. Бу дегани эртадан бузилиш бошланади дегани эмас, ҳали охирги нуқта қўйилганича йўқ. Бу ҳозир лойиҳа таклифи, ҳали ЙUNЭСКО билан келишиш босқичи бор», —таъкидлаган вазир.

Ҳозир Бухоро туризм маркази тушадиган жойда хатлов ишлари олиб борилмоқда. Яъни тартибга кўра, у ерда қанча бино бор, кимга тегишли экани ҳақида маълумот йиғилади.