Самарқанд шаҳрида тадбиркорнинг маблағини талон-торож қилган менежер аниқланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Самарқанд шаҳар бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Унда аниқланишича, «Б.Т.» МЧЖнинг Самарқанд вилояти бўйича менежери Ж.Ж. ва бошқалар 2022 йилнинг август—октябрь ойларида хорижда ишлаб чиқарилган электрон тамаки маҳсулотларини юк хатлари билан қабул қилиб олган.
Улар ушбу маҳсулотлар сотувидан тушган 173 миллион сўм нақд пулларни ўзлаштириш йўли билан талон-торож қилган.
Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)