Ўзбекистон Соғлиқни сақлаш вазири Амрилло Иноятов Туркиянинг Ўзбекистондаги фавқулодда ва мухтор элчиси Олган Бекар бошчилигидаги делегация билан учрашув ўтказди. Бу ҳақда Соғлиқни сақлаш вазирлиги ахборот хизмати хабар берди.
Таъкидланишича, даволаш муассасаларини қуриш, тиббий таълим ва менежментни ривожлантириш, кадрлар малакасини ошириш каби йўналишларда икки давлат Соғлиқни сақлаш вазирликлари ўртасида қўшма лойиҳалар амалга ошириляпти. Учрашувда Туркиянинг Соғлик билимлари университети ректори Жавдат Эрдол билан келишувларга эришилди.
Жумладан, Ўзбекистонда юқори технологияли операцияларни амалга оширадиган тор соҳа мутахассисларини икки йиллик клиник ординатурада тайёрлаш қўшма дастурини йўлга қўйиш бўйича музокаралар муваффақиятли якунланди. Бунда тиббий таълимнинг илк ўқув йили Соғлик билимлари университети профессор-ўқитувчилари томонидан Ўзбекистонда олиб борилади. Иккинчи ўқув йили эса Туркиядаги 60 та нуфузли клиникада давом эттирилади.
Мулоқот доирасида давлат раҳбари топшириғига асосан, Қуролли Кучлар Ҳарбий тиббиёт академияси ва Ҳарбий госпитали учун менежмент ҳамда даволаш йўналишларида малакали кадрлар тайёрлаш, қўшма таълим дастурларини ишга тушириш, туркиялик ҳарбий шифокор-профессорларни ўқув жараёнларига жалб қилиш бўйича Ўзбекистон Мудофаа вазирлиги вакиллари иштирокида Соғлик билимлари университети билан ҳамкорлик истиқболлари муҳокама қилинди.
Изоҳ (0)