Навоийда ҳужжатларни қалбакилаштириб, қарийб 9 гектар ерда сунъий балиқ кўли яратган тадбиркор ушланди

Навоий вилояти Навбаҳор туманида ер талон-торож қилиниши билан боғлиқ жиноят фош этилди. Бу ҳақда Бош прокуратура хабар қилди.

Қайд этилишича, Навоий вилояти прокуратураси томонидан олиб борилган текшириш давомида «Ф.Г.Ф» хусусий корхонаси раҳбари А.Ж. томонидан Навбаҳор тумани «Навкар» маҳалласи ҳудудидан туман ҳокимининг қарорига асосан хусусий корхонага балиқхона барпо этиш учун 10 йил муддатга ижара ҳуқуқи билан ажратилган жами 9,2 гектар ер майдони ҳужжатлари қалбакилаштиргани аниқланган.

У 4,8 гектари яйлов ери, 4,4 гектари балиқларга озуқа етиштириш учун экин ер майдонининг умумий 8,8 гектар қисмига енгил конструкцияли омборхона, қоровулхона ва офис қуриш учун ҳужжатларни қалбакилаштириб, кадастр ҳужжатларини расмийлаштиришга эришган ҳамда сунъий балиқ кўли барпо этган.

Ҳолат юзасидан А.Ж.га нисбатан Жиноят кодексининг 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 1-қисми билан жиноят иши қўзғатилган. Ҳозирда тергов ҳаракатлари олиб борилмоқда.