Қашқадарё вилояти Яккабоғ туманидаги АГТКШ истеъмол қилган электр энергияси ҳажмини ойлик ҳисоботларда камайтириб кўрсатиб келаётгани аниқланди.
Энергетика вазирлиги ишчи гуруҳи томонидан ўтказилган назорат тадбирида Қашқадарё вилоятининг Яккабоғ туманида фаолият юритиб келаётган «Адиба» МЧЖга қарашли автомобилларга газ тўлдириш компрессор шохобчасида электр энергиясидан ноқонуний фойдаланиш ҳолати аниқланди.
Хусусан, ушбу шохобча ҳақиқий истеъмол қилган электр энергияси сарфини яшириб, ойлик ҳисоботларни камайтириб кўрсатиб келаётгани маълум бўлди.
Шунингдек, шохобча ўзига тегишли трансформаторни ўзбошимчалик билан (электр таъминоти корхонаси билан келишмасдан) алмаштирганлиги аниқланди. Бунинг натижасида ҳисобга олинмаган электр энергияси бўйича 752 млн сўм миқдорида қайта-ҳисоб амалга оширилди.
Ушбу ҳажмдаги электр энергияси ўртача 8,3 мингта хонадоннинг бир ойлик истеъмолини ташкил қилади. Қоидабузар истеъмолчига нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди. Назорат тадбирлари давом эттирилмоқда.
Изоҳ (0)