Қорақалпоғистоннинг Нукус шаҳридаги ҳарбий госпитал таъмирдан чиқарилди. Ҳар бир мутахассис ўз хизмат хонаси, алоҳида қабулхона ва муолажалар хоналарига эга бўлди.
Бу ҳам бўлса кўрсатилаётган тиббий хизмат ва тиббий маданиятнинг юксалишига, тиббиёт соҳа мутахассисларининг ўз устида ишлашига, хизмат мажбуриятлари билан бир қаторда илм-фан билан шуғулланишига ҳам имкон яратди.
Соҳага даволашнинг янги ва замонавий усул ва услублари жорий этилаётгани боис бугун ушбу шифо улашувчи даргоҳда клиник-биохимик лаборатория, ЭФГДС, ЭКГ, ультратовуш текшируви ҳамда рентгенография текшируви хизмат кўрсатмоқда.
Мазкур госпиталда Мудофаа вазирлиги ҳарбий хизматчиларидан ташқари Миллий гвардия, ДХХ Чегара қўшинлари, Фавқулодда вазиятлар вазирлигининг ҳудудий бўлинмалари ҳарбий хизматчиларига тиббий хизматлар берилади. Нукус ҳарбий госпиталида аҳолига пуллик тиббий хизматлар кўрсатилиши ҳам йўлга қўйилган.
Капитал таъмир натижасида госпитал ҳудудида Нукус санитария-эпидемиологик назорат бўлимининг COVID-19 юқумли касаллигини тез аниқлаб берадиган вирусология лабораторияси ҳам жойлаштирилди.
Капитал қурилиш ишлари давомида госпиталда аутсорсинг тизими асосида фаолият кўрсатаётган шинам ошхона, анжуманлар зали, спорт ва жисмоний даволаш ишлари билан шуғулланиш учун тренажёрлар билан жиҳозланган спорт зали бунёд этилди.
Изоҳ (0)