Андижонда телефон, компьютер, планшет, тилла буюмлар ўмарган аёллар ушланди

Андижон вилояти Улуғнор туманида фуқаронинг шахсий мулкларини ўғирлаган аёллар қўлга тушди. Бу ҳақда Ички ишлар вазирлиги хабар қилди.

Қайд этилишича, Улуғнор туманида яшовчи фуқаро Д.Ш. ИИБга ариза билан мурожаат қилиб, 28 декабрь куни яшаш хонадонидан LG телефони, Lenovo ноутбуки, Samsung Galaxy А7 Lite планшети ва 5 миллион сўмлик тилла тақинчоқларини номаълум шахс ўғирлаб кетганини маълум қилган. Д.Ш. номаълум шахсга нисбатан қонуний чора кўришни сўраган.

Олиб борилган тезкор-қидирув тадбирлари натижасида гаджетларни ўғирлаган шахслар Наманган вилоятида яшовчи, муқаддам судланган аёллар — Й.У. (1999 йилда туғилган) ва Н.С. (2003 йилда туғилган) экани аниқланган. Улардан ашёвий далиллар ҳужжатлаштириб олинган.

Уларга нисбатан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари олиб борилган.