Ўзбек кино оламининг таниқли актёрларидан бири Адиз Ражабов 6 январь куни 39 ёшни қарши олди. Ушбу сана муносабати билан актёр иштирокидаги энг муваффақиятли фильмлар ҳақида сўз юритамиз.
Бухорода туғилган юлдуз
Адиз Ражабов 1984 йилнинг 6 январида Бухоро вилоятида таваллуд топган. Адиз мактабни тугатгач Ўзбекистон давлат санъат ва маданият институтида актёрлик бўйича таҳсил олади. 2005 йилда «Наҳотки сен» фильмида илк дебют ролини ижро этади. 2006 йилда режиссёр Соҳиб Аббосхон томонидан «Сен мени севасанми?» фильми суратга олиниб, бу фильмдаги роли Ражабовга катта эътироф келтиради.
Бугунга қадар Адиз Ражабов 35 дан ортиқ фильм ва сериалларда турли ролларни ижро этган. Айни пайтда «Дийдор» театр студиясида фаолият олиб бораётган актёр ўзининг Instagram саҳифасида 1,5 миллиондан зиёд обуначига эга. Қуйида Адиз Ражабов рол ижро этган фильмлар билан қисқача танишинг.
«Бўрилар»
Актёр 2007 йилда Зебо Наврўзова режиссёрлигида суратга олинган «Бўрилар» фильмида рол ижро этади. Ушбу фильмда Адиз Ражабов салбий қаҳрамон образини маҳоратли тарзда очиб бергани сабаб кўп сонли мухлислар орттиради.
«Супер келинчак»
«Бўрилар» кинокартинасидан сўнг Адиз Ражабов комедик ролга қўл уради. 2008 йилда суратга олинган «Супер келинчак» фильмида актриса Диана Ягофарова билан бирга ижро этган бош роли унинг иқтидорли актёр сифатида элга танилишига сабаб бўлди. Фильмда Саида Раметова қайнона образини гавдалантирган бўлса, Адиз Ражабов унинг ўғли Сардор образида экранга чиққан.
«Пойма-пой»
Бой оилада вояга етган шаҳарлик олифта йигит ўз уйида хизмат қилаётган оиланинг қизини севиб қолади. Ота-оналар бу никоҳга қарши бўлса-да, ёшлар бу қаршиликка қарамай турмуш қуради. Биргаликда мустақил ҳаёт кечира бошлайдилар. Ўзига тўқ улғайган йигит учун оддий кундалик қийинчиликларни енгиб ўтиш осон бўлмайди. Кетма-кет бахтсизликлар қаҳрамонларни аёвсиз синайди. «Пойма-пой» фильми шундай сюжет билан бошланади. Фильмда Адиз Шоҳрух образида маҳоратли актриса Севара Солиева билан бирга бош ролни ижро этади.
«Ўзимдан ўзимгача»
2009 йилда Абдувоҳид Ғаниев «Ўзимдан ўзимгача» фильмини суратга олган. Мазкур фильмда Даврон ва Наримон исмли қиёфадош, аммо бир-бирига қарама қарши икки персонаж ролини актёр Адиз Ражабов ижро этган. Ота-онасининг қистови сабаб уйланган Даврон тўйи куни уйидан қочиб кетади. У чекка қишлоққа етганида эҳтиётсизлиги сабаб чўпон Наримонни уриб юборади. У қонга беланган қиёфадошини кўриб, қўрқиб кетади ва машинасини ташлаб қочади.
Чўпонни қимматбаҳо машинанинг ёнида кўрганлар уни Даврон деб ўйлаб, оила аъзоларига қўнғироқ қилишади. Шу воқеадан сўнг Наримон шаҳарга, бадавлат оила аъзолари даврасига кетади. Даврон эса қишлоқда қолиб чўпонлик қилади. Фильм якунида Давронга унаштирилган қиз Наримонни севиб қолади. Қишлоқдаги қиз эса шаҳарлик Давронга кўнгил қўяди.
«Қалб кўзи»
2010 йилда суратга олинган бу фильмда Адиз устоз актёрлар Убайдулла Омон, Гулчеҳра Саъдуллаева, Эркин Комиловлар билан бирга рол ижро этишга муваффақ бўлади. Шу билан бирга фильмда Шаҳзода Матчонова, Асал Шодиева, Самандар Ҳамроқуловларни ҳам турли образларда кўриш мумкин. Адиз ушбу кинокартинада салбий қаҳрамон образида, яъни севгисига хиёнат қилган вафосиз йигит қиёфасида намоён бўлади.
«Салом севги, хайр севги»
2012 йилда суратга олинган «Салом севги, хайр севги» фильмида Адиз Ражабов аутизм билан туғилиб, вояга етган йигит — Бахтиёр ролини ижро этади. Ақлий ва руҳий ҳолатларни очиб бериш учун актёр узоқ тайёргарлик кўргани унинг образини маҳорат билан акс эттирганида ҳам яққол номоён бўлади. Гарчи аутизм синдроми тузалмаган бўлса-да, у моҳир архитектор бўлиб етишади. Бироқ у болаликдаги дўсти ва кейинчалик севгилисига айланган Цензоранинг ота-онаси томонидан рад этилади. Бу эса йигитнинг руҳий зўриқишига, онасининг чуқур қайғусига сабаб бўлади. Фильмда Адизнинг актёрлик маҳорати дарҳол кўзга ташланади.
«Учар қиз»
Ёлқин Тўйчиевнинг ушбу комедик-фантастик фильми Ер сайёрасига қанотларида учиб тушган ғайриоддий қиз ҳақида. У бошқа сайёрадан номаълум сабабларга кўра учиб келган. Учар қиз бош қаҳрамонимиз яшайдиган ўзбек қишлоқларидан бирига қўнишга қарор қилади. Ўзга сайёрадан учиб келган қиз образида Асал Шодиева, ихтирочиликни ва ғайриоддий нарсаларни ўйлаб топишни яхши кўрадиган йигит образида Адиз Ражабов ҳамда унинг ота-онаси қиёфасида актёрлар Фарҳод Абдуллаев ва Саида Раметоваларни кўриш мумкин.
«Тўқликка шўхлик»
2013 йилда катта экранларда намойиш этилган бу фильмда Адиз Ражабов ўзига тўқ оиланинг фарзанди Алишер ролини ижро этган. Хотини Лайло образида Шаҳзода Матчонова онасининг гапига кириб ўз оиласини барбод қилишгача боради. Оқибатда рисоладагидек оила пароканда бўлади. Фильмда Матёқуб Матчонов, Барно Қодирова, Бахтиёр Қосимов, Муяссар Бердиқуловалар ота-она қудалар ролида намоён бўлади.
«Фарзандим»
2011 йилда мелодрама жанрида суратга олинган «Фарзандим» фильми томошабинларнинг севимли киносига айланиб улгурди. Элёр Ҳошимов режиссёрлигида яратилган бу фильмда Адиз Ражабов фотограф Дилшод, Дилноза Кубаева Насиба ролида бир-бирига ниҳоятда муҳаббатли жуфтлик ролини қойилмақом тарзда ижро этган. Аммо бу оила 10 йилларки фарзандсизлик доғида қийналади. Ниҳоят, Насиба турмуш ўртоғининг яна бир бор оила қуришига розилик берганида ўзи ҳам фарзанд кутаётгани ҳақида хабар топади. Фарзандини дунёга келтиради-ю, Насиба дунёдан кўз юмади. Бу фильмнинг узвий давоми сифатида «Фарзандим-2» суратга олинади. Ўз фарзанди ўгай она қўлида аёвсиз қийноқлар остида қолади, отанинг эса бундан асло хабари бўлмайди. Иккинчи фильм ҳам муваффақиятли тарзда шуҳрат қозонади.
«Сарвқомат дилбарим»
2018 йилда «Ўзбеккино» миллий агентлиги Қирғизистон Республикаси билан ҳамкорликда «Сарвқомат дилбарим» номли қўшма фильмни суратга олади. Фильм ёзувчи Чингиз Айтматов таваллудининг 90 йиллигига бағишланиб, унда ўзбек-қирғиз акёрлар гуруҳи иштирок этади. Сарвар Каримов режиссёрлигида олинган фильмда бош ролларни Адиз Ражабов ҳамда қирғизистонлик актриса Мадина Талипбек гавдалантиради. Фильм ҳайдовчи йигит Рустамнинг қизил дуррача ўраган қишлоқлик бир қизни севиб қолгани, унга ота-онасининг розилигисиз уйлангани ва унга қилган хиёнатлари, афсус ва армонлари ҳақида. Адиз бу фильмда Рустам образида намоён бўлади.
«Ҳамроҳ»
2017 йилда катта экранларга чиққан фильм Бухоро шаҳри, Жиззах вилояти ва Тошкент шаҳрида суратга олинган. Фильм 45 кун ичида суратга олинган бўлиб, тайёргарлик ишлари учун 75 кун вақт сарфланган. Фильм триллер, драма жанрида суратга олинган.
Фильмда Карим Мирходиев, Лола Элтоева, Адиз Ражабов, Юлдуз Ражабова, Умид Искандаров, Бобур Йўлдошев, Нафосат Шодиева сингари актёр, актрисалар жамоаси йиғилган.Мавзуга доир: Озодбек Назарбеков актёрлар — Алишер Узоқов ва Адиз Ражабовнинг «Мендирман Жалолиддин» сериалида рол ижро этмагани сабабини айтди
Изоҳ (0)