Сурхондарё вилояти Термиз шаҳридаги бозорда 4 январь куни сотувчилар ҳуқуқ-тартибот идоралари ходимларига қаршилик кўрсатиб, жамоат тартибини бузди. Ички ишлар вазирлиги ахборот хизмати ҳолат юзасидан маълумот берди.
Қайд этилишича, «Юбилейний» бозор ҳудудида ноқонуний савдо ишлари билан шуғулланувчи шахсларни шаҳар ҳокимининг қарори билан «Яшил дунё» савдо марказига кўчириш ишлари амалга оширилган.
Ижтимоий тармоқларда Термизда ички ишлар ходимлари аёлларни мажбурлаб автобусга чиқаргани ҳақида тасвирлар тарқалди. Видеода ходимлар фуқароларни махсус автобусга мажбуран чиқараётганини кўриш мумкин.
Бундан олдин янги ҳудуддан савдо расталари ажратилиб, эски ҳудудни тарк этиш ҳақида огоҳлантирилганига қарамасдан бир гуруҳ сотувчилар норозилик билдириб, ҳокимият вакилларига қаршилик кўрсатган ва жамоат тартибини бузган.
Бозор ҳудудига жамоат тартибини тиклаш учун жалб қилинган Ички ишлар органлари ва Миллий гвардия ходимлари томонидан 14 нафар ҳуқуқбузарлар ИИБга олиб келинган ва улар билан тушунтириш-профилактик ишлари олиб борилган.
Ҳуқуқбузарлик ҳолати юзасидан тўпланган ҳужжатлар асосида Жиноят ишлари бўйича Термиз шаҳар суди томонидан 6 нафар фуқарога БҲМнинг 3 баравари миқдорида, 3 нафар фуқарога БҲМнинг 5 баравари миқдорида жарима, 4 нафар фуқарога эса 5 сутка маъмурий қамоқ жазолари тайинланди.
Изоҳ (0)