Жанубий Корея пойтахти Сеул шаҳрида Тошкент тиббиёт академияси (ТТА) ўзининг расмий ваколатхонасини очди, дея хабар бермоқда «Дунё» ахборот агентлиги.
Қайд этилишича, ваколатхонанинг очилиш маросимида Тошкент тиббиёт академияси вакиллари, академиянинг Жанубий Кореядаги ҳамкорлари, Ўзбекистоннинг Сеулдаги дипломатия ваколатхонаси ходимлари, академияда таҳсил олаётган иқтидорли талабалар ва уларнинг ота-оналари иштирок этган.
Академиянинг халқаро алоқалар бўлими бошлиғи Мурод Жафаров тадбир иштирокчиларига Тошкент тиббиёт академияси фаолияти ва унинг имкониятлари тўғрисида батафсил маълумот берган. Иштирокчиларга ТТА фаолиятига оид видеороликлар намойиш этилган.
Тадбирда иштирок этган ҳамкорлар Жанубий Кореядан кўплаб талабаларни Тошкент тиббиёт академиясида ўқишга юбориш, шунингдек, академиянинг кўплаб талабаларини Кореянинг нуфузли тиббиёт олийгоҳларига қабул қилишни ташкил этиш ҳамда бу борада ўзаро ҳамкорликни ривожлантиришга эътибор қаратиш зарурлигини таъкидлаган.
Таъкидланишича, Ўзбекистон ва Жанубий Корея ўртасида тиббиёт йўналишида самарали ҳамкорлик муносабатлари ўрнатилган. Ҳозирги пайтда Тошкент тиббиёт академияси Корея Республикасининг 20 дан ортиқ университети ва клиникалари билан ҳамкорлик қилмоқда.
Изоҳ (0)