Ижтимоий тармоқларда товуқ гўштини емаслик, унда ортиқча гормонлар борлиги ҳақида турли хабар тарқалмоқда.
«Дарё» мухбири ушбу хабарлар қанчалик ҳақиқатга тўғри келиши хусусида Ҳайвонлар касалликлари ташхиси ва озиқ-овқат маҳсулотлари хавфсизлиги давлат илмий маркази директори Баҳриддин Тонгёриқовдан изоҳ олди.
Мутахассиснинг алоҳида таъкидлашича, товуқ гўштини сотиб олаётган вақтда биринчи галда унинг қадоқланганига эътибор бериш керак.
«Айрим тадбиркорлар товуқ гўштини қадоқланмаган ҳолда сотишга ҳаракат қилади. Гўштни нима учун қадоқланганини сотиб олиш керак? Боиси товуқ гўшти атрофдаги ёт нарсаларни ўзига шимиб олиш хусусиятига эга. Бундан ташқари, қадоқда ишлаб чиқарувчи корхона номи, сақлаш муддати ва қандай ҳароратда сақлангани кўрсатиб ўтилади», — деди марказ раҳбари.
Баҳриддин Тонгёриқов Ўзбекистонда ишлаб чиқарувчилар товуқ боқишда гормонлардан қанчалик фойдаланиши ҳақидаги саволга ҳам жавоб берди.
«Кўпчиликда товуқ гўштига қўшимчалар: витаминлар, перекислар ёки гормонлар қўшиляпти деган эътирозлар бўляпти. Албатта витаминлар, қўшимчалар, перекислар берилади. Лекин бугунги кунда жаҳон бозорида гормон нархи кескин ошиб кетган. Шу боис Ўзбекистонга гормон олиб келиб, уларни товуқ боқишда фойдаланиш иқтисодий самарасиз. Иккинчидан, агар товуқ гўштида гормон борлиги аниқланса барчаси тегишли тартибда йўқ қилинади», — деди у.
Изоҳ (0)