Европа иқтисодиёти келаси йил қисқаради, чунки юқори инфляция ва потенциал энергия танқислиги ишлаб чиқаришни камайтириб, ишсизликни кучайтиради. Бу ҳақда Financial Times хабар бермоқда.
Financial Times томонидан сўралган 37 иқтисодчининг қарийб 90 фоизи ягона валюта ҳудуди аллақачон таназзулга юз тутганини ва келгуси йил давомида ЯИМ қисқаришини прогноз қилган.
Morgan Stanley иқтисодчиси Чиара Зангареллига кўра, Европа газ бозорлари асосий хавф бўлиб қолмоқда. Қўшимча таъминот узилишлари ёки совуқ қиш янги кескинликларга олиб келиши мумкин.
Иқтисодчиларнинг аксарияти Европа ўзининг энг ёмон энергетика инқирозидан омон қолганига ишонади. Шу билан бирга, кузнинг илиқ келиши газ омборлари қувватини сақлаб қолиш имконини берди.
Кўпгина экспертлар 2023 йилда ғайритабиий совуқ қиш ёки Россиядан етказиб беришнинг янада қисқариши захираларнинг тугашига олиб келиши мумкинлигидан огоҳлантирди.
Европа давлатлари Норвегия, АҚШ ва Яқин Шарққа мурожаат қилиш, шунингдек, муқобил энергия манбаларига ўтиш орқали Россия газига қарамликни камайтиришга муваффақ бўлди.
Аммо иқтисодчиларнинг огоҳлантиришича, Россия хом ашё етказиб бермаса, келгуси қиш олдидан газ омборларини тўлдириш анча қийин бўлади.
Иқтисодиётдаги пасайиш Европадаги ипотека харажатларининг сезиларли даражада ошиши билан биргаликда минтақадаги уй-жой бозорида кескин ўзгаришларга олиб келиши мумкин. Прогнозларга кўра, кейинги йил Европада ўртача кўчмас мулк нархлари 4,7 фоизга тушади.
Европа иқтисодиёти 2023 йилда 0,01 фоизга қисқариши кутилмоқда. Бу прогноз Европа Комиссияси ва Марказий банки прогнозларидан кўра кўпроқ пессимистик бўлиб, улар Иттифоқ иқтисодиёти келаси йилда мос равишда 0,3 фоиз ва 0,5 фоиз ўсишини кутган эди.
Римдаги Луис университети иқтисод профессори Marcelло Мессори, энергия шоки туфайли юзага келган баланд инфляцияга қарши туриш учун Марказий банк фоиз ставкаларининг янада ошиши иқтисодиётда жиддий рецессияга олиб келишини айтди. Сўнгги марта регулятор базавий ставкани 15 декабрда 50 базавий пунктга, яъни 2,5 фоизга оширган эди.
Иқтисодчиларнинг фикрига кўра, евроҳудуддаги инфляция камида яна икки йил давомида Марказий банк томонидан белгиланган 2 фоиздан юқори бўлиб қолади.
Ўртача ҳисобда, FT респондентлари келгуси йилда нархлар 6 фоиздан сал кўпроқ ва 2024 йилда деярли 2,7 фоизга ошишини кутмоқда.
Шу ойнинг бошида Европа Марказий банки келгуси йилда нархларнинг ўсиши ўртача 6,3 фоиз, 2024 йилда 3,4 фоиз ва 2025 йилда 2,3 фоиз бўлишини тахмин қилди.
Изоҳ (0)