Буюк Британиянинг Иқтисодиёт ва бизнес тадқиқотлари маркази (CEBR) таҳлилчиларининг фикрича, келгуси йилда инфляция ошиб бораётган мамлакатлар марказий банкларнинг кураш усуллари туфайли жаҳон иқтисодиёти рецессияга юз тутиши мумкин. Бу ҳақда CEBR ҳисоботида қайд этилди.
«Эҳтимол, инфляциянинг ошишига жавобан юқори фоиз ставкалари натижасида жаҳон иқтисодиёти келаси йил рецессияга юз тутиши мумкин», — дейилади Британия таҳлил маркази ҳисоботида.
«Инфляцияга қарши курашда ҳали ғалаба қозонилгани йўқ. Иқтисодий харажатларга қарамай, марказий банклар 2023 йилда худди шундай амалиётга амал қилишларини кутамиз. Инфляцияни қулайроқ даражага тушириш харажатлари келгуси бир неча йил ичида иқтисодий ўсиш истиқболларининг ёмонлаштиради», — дейди CEBR.
Аввалроқ Халқаро Валюта Жамғармаси 2023 йилда жаҳон иқтисодиётининг рецессияга кириши эҳтимоли тахминан 25 фоизни ташкил этишини, рецессия эса жаҳон иқтисодиётининг қарийб учдан бир қисмида кузатилишини прогноз қилган эди.
Бундан ташқари, CEBR прогнозларига кўра, 2037 йилга келиб жаҳон ялпи ички маҳсулоти (компания таҳлилчилари анъанавий равишда кейинги 15 йил учун прогнозлар қилади) ривожланаётган мамлакатлар иқтисодиётидаги сакраш туфайли жорий йилга нисбатан икки баравар кўпаяди.
Шу билан бирга, Хитой, янги прогнозга кўра 2036 йилда ялпи ички маҳсулот бўйича АҚШдан ўтиб кетади.
Худди шу даврга келиб Ҳиндистон дунёнинг учинчи энг йирик қитисодиётига айланади. Мамлакат ялпи ички маҳсулоти 2035 йилда 10 триллион долларга етиши кутилмоқда.
Мавзуга доир: 2023 йил учун глобал ялпи ички маҳсулот ўсиши прогнози 1,4 фоизгача пасайтирилди — Fitch
Изоҳ (0)