Ўзбекистон ташқи ишлар вазири Владимир Норов 27 декабрь куни Қатарнинг Ўзбекистондаги элчиси этиб тайинланган Ҳасан Ҳамза Ҳошимни қабул қилди.
ТИВ матбуот хизматининг маълум қилишича, вазир элчидан ишонч ёрлиқлари нусхаларини қабул қилиб, уни лавозимга киришгани билан табриклади ва масъулиятли фаолиятига муваффақиятлар тилади.
Суҳбат давомида Ўзбекистон—Қатар муносабатларининг сиёсий, савдо-иқтисодий ва маданий-гуманитар соҳалардаги бугунги ҳолати ва уни ривожлантириш истиқболлари муҳокама қилинди. ТИВ раҳбари Қатар томонини футбол бўйича Жаҳон чемпионати муваффақиятли ўтгани билан ҳам табриклади.
Владимир Норовнинг маълум қилишича, 2023 йилда Ўзбекистонда Қатар элчихонаси очилади.
«Қатарнинг мамлакатимизда элчихонаси очилишини олқишлаймиз. Ишончим комилки, Қатар дипломатик миссиясининг 2023 йилдан бошлаб фаолият юритиши икки томонлама ҳамкорлик салоҳиятини тўлиқ рўёбга чиқаришга хизмат қилади», — деб ёзган у Facebook’даги саҳифасида.
Изоҳ (0)