Термиз халқаро аэропорти 55 кунлик танаффусдан сўнг яна очилди. Бу ҳақда Uzbekistan Airports матбуот хизмати хабар берди.
Аэропорт фаолияти янги аэродром мажмуасини фойдаланишга топширишга тайёргарлик кўриш муносабати билан 1 ноябрдан 25 декабргача тўхтатилганди.
26 декабрь куни соат 08:15 да аэропорт биринчи рейсни — бортида 146 нафар йўловчи бўлган Тошкент—Термиз йўналиши бўйича HY-65 рейсини қабул қилди.
Хабарда айтилишича, қайта қуриш доирасида узунлиги 3000 метр ва эни 60 метр бўлган янги учиш-қўниш йўлаги, юриш йўлаклари ва учта самолёт тўхташ жойи учун перронни ўз ичига олган, янги 4Э тоифали аэродром мажмуаси қурилди. Шунингдек, аэродромга замонавий CАТ-I ICAO ёритиш ускуналари тизими, метеорологик ва радионавигация қўниш тизимлари ўрнатилди.
Янги аэродром мажмуасини қуриш лойиҳаси 550 миллиард сўмга баҳоланмоқда. Айни пайтда 377 миллиард сўмлик ишлар бажарилган. Лойиҳанинг якуний босқичи — учта самолёт турар жойи ва иккинчи юриш йўлаги 2023 йилнинг апрелигача якунланиши режалаштирилмоқда.
«Термиздаги янги аэродромнинг учиш-қўниш йўлаги бетондан қурилгани эътиборга молик. Бу Сурхондарё вилоятининг иссиқ иқлими шароитида энг яхши ечим — бетондан ясалган учиш-қўниш йўлаги мустаҳкамроқ ва чидамлироқдир. Бугунги кунга қадар фақат Навоий ва Термиз аэропортларида бетондан учиш-қўниш йўлаги қурилган», — дейилади хабарда.
Изоҳ (0)