Паркент туманида дарахтлар ноқонуний кесилгани юзасидан жиноят иши қўзғатилди

Тошкент вилоятининг Паркент туманида дарахтлар ноқонуний кесиб ташлангани ҳақида хабар берилган эди. Вилоят прокуратураси ҳолат юзасидан жиноят иши қўзғатилганини маълум қилди.

Вилоят Экология ва атроф-муҳитни муҳофаза қилиш бошқармаси маълумотида Паркент тумани Ободонлаштириш бошқармаси томонидан Давлат хизматлари агентлигига 25 октябрь куни йўлланган аризада қуриётган ёки қуриб қолган 6 туп ёввойи олма, 16 туп терак, 12 туп Зарафшон арчаси, 25 туп паст бўйли қайрағоч, 8 туп шумтол, 6 туп заранг баргли чинор дарахтларини кесишга рухсат сўралгани, бироқ Красногорск қўрғони ҳудудидаги «Ойдин», «Тойбулоқ», «Саид ота«, »Файзобод" маҳалласи ҳудудлари кўздан кечирилганда жами 57 туп кўп йиллик соғлом дарахтлар таг қисмидан ноқонуний кесилгани қайд этилганди.

Вилоят прокуратураси ҳолат юзасидан текширув ўтказди.

Аниқланишича, туман Ободонлаштириш бўлими томонидан туманнинг «Қизил тоғ» МФЙ ҳудудидаги қуриб қолган дарахтларни кесиш юзасидан Давлат хизматлари агентлигига электрон шаклда мурожаат қилинган. Жараёнда масъулиятсизликка йўл қўйилгани натижасида рухсат берилган дарахтлардан ташқари 7 туп дарахтлар ҳам кесилган ва ўсимлик дунёсига 587 503 185 сўмлик зарар етказилган.

Ҳолат юзасидан туман ободонлаштириш бўлими бошлиғи ва бошқаларга нисбатан Тошкент табиатни муҳофаза қилиш прокуратураси томонидан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан жиноят иши қўзғатилди.

Бундан ташқари, Тошкент вилоятининг Қуйи Чирчиқ туманида ҳам дарахтлар ноқонуний кесиб кетилгани аниқланганди. Ҳолат юзасидан тегишли тартибда далолатнома расмийлаштирилиб, табиатга этказилган зарар миқдори 394 миллион сўм, деб баҳоланган.