Россияликлар орасида янги йил байрами учун қўшни давлатларга саёҳат қилишга бўлган талаб ўтган йилга нисбатан 32 фоизга ошди. Бу ҳақда «Yandex.Travel» таҳлилчилари тадқиқотига таяниб «РБК» хабар бермоқда.
Тадқиқот меҳмонхоналарни брон қилиш ва хизмат фойдаланувчиларидан олинган авиачипталарни қидириш бўйича маълумотлар асосида ўтказилган.
Арманистон бундай давлатлар орасида россияликлар учун энг машҳур йўналишга айланди ва Ереванга саёҳат энг юқори талабга эга бўлди. Энг машҳур йўналишларнинг умумий рейтингида у иккинчи ўринни эгаллади.
Саёҳатчилар орасида энг оммабоп бўлган яқинроқ масофадаги хориж мамлакатлари учлигига Қозоғистон ва Ўзбекистон ҳам киради. Умумий рейтингда улар учинчи ва тўртинчи ўринларни эгаллади.
Бундан ташқари, Қирғизистон ва Озарбайжон Янги йил байрамлари учун энг машҳур хорижий йўналишлар 10 талигидан жой олди — улар мос равишда олтинчи ва саккизинчи ўринларни эгаллади.
Россияда янги йилда хорижга чиқишни хоҳловчилар сони ўтган йилга нисбатан 4 фоизга ошган. Узоқроқ хорижий йўналишлар орасида россияликлар учун Туркия (рейтингда биринчи ўрин), Бирлашган Араб Амирликлари ва Миср (мос равишда бешинчи ва эттинчи ўринлар) кўпроқ талабга эга.
Шунингдек, кучли ўнталикка Сербия ва Исроил (тўққизинчи ва ўнинчи қаторлар) ҳам кирган. Россияликлар асосан Истанбул, Дубай, Анталия, Тель-Авив ва Белградга боришни хоҳламоқда. Улар йўналишидан қатъи назар ўртача бир ҳафта саёҳат қилмоқчи.
Изоҳ (0)