Ўзбекистонда табиий газ ишлаб чиқариш ҳажми камайди, кўмир эса кўпайди

Давлат статистика қўмитаси Ўзбекистоннинг 2022 йил январь—ноябрь ойларига кўра саноат ишлаб чиқариши ҳақида маълумот берди.

Маълумотларга кўра, январь—ноябрь ойларида 47,3 млрд куб метрдан ошиқ табиий газ, 1,2 млн тонна газ конденсати ҳам ишлаб чиқарилган.

Шунингдек, ноябрь ойининг ўзида мамлакатда 3,5 млрд куб метрдан ортиқ табиий газ, 108,1 млн тонна газ конденсати ишлаб чиқарилган.

Ўтган йилнинг шу даврига нисбатан иккала саноат соҳасида ишлаб чиқариш камайган — мос равишда 1,6 млрд куб метр (3,2 фоиз) ва 23,8 минг тоннага (2 фоиз).

Шунингдек, йил бошидан бери Ўзбекистонда 4,8 млн тонна кўмир ишлаб чиқарилган. Бу ўтган йилнинг худди шу даврига нисбатан 174,1 минг тонна кўп. Биргина ноябрь ойининг ўзида бу кўрсаткич 432,6 минг тоннани ташкил этган.

Мамлакатда жорий йилнинг сентябр ойида 476,7 минг тонна, октябрь ойида эса 484,4 минг тонна кўмир ишлаб чиқарилган эди.

Октябрь ойида 65 минг тонна, 2022 йилнинг дастлабки 11 ойида 721,2 минг тонна нефть ишлаб чиқарилган. Ўтган йилнинг шу даврига нисбатан соҳадаги ишлаб чиқариш 12,9 минг тоннага кўпайган.

Мавзуга доир: 2022 йилда дунёда кўмир қазиб олиш рекорд даражага етиши кутилмоқда