Хитойнинг бюджет тақчиллиги 1 трлн доллардан ошиб, рекордни ташкил этди

Хитойнинг 2022 йилда бюджет тақчиллиги рекорд даражага етди. Бу ҳақда Bloomberg хабар бермоқда. 

Таъкидланишича, COVID-19 учун «нол бардошлик» сиёсати ва уй-жой бозорида давом этаётган пасайиш иқтисодиёт ва давлат молиясига зарар етказган.

Агентликнинг Хитой Молия вазирлиги маълумотларига асосланган ҳисоб-китобларига кўра, январь ноябрь ойларида бюджет тақчиллиги 7,75 триллион юанни (1,1 триллион доллар) ташкил қилган. 

Бу ўтган йилнинг шу даврига нисбатан икки баравар кўп. Ҳатто 2020 йилги пандемия инқирозида ҳам бундай бюджет тақчиллиги кузатилмаган эди. 

Хитой молия вазири Лиу Куннинг сўзларига кўра, бу йилги жами бюджет харажатлари ўтган йилги 24,6 триллион юандан 26,3 триллион юанни ташкил этиши кутилмоқда.

Хитойда коронавирус чекловлари истеъмолчи ва бизнес харажатларига таъсир қилиб, иккинчи чоракда иқтисодиётни рецессияга олиб келди. Жорий чоракда коронавируснинг кўпайиши октябр ва ноябрь ойларида чакана савдонинг пасайишига олиб келди.

Коронавирусга нисбатан «нол толерантлик» сиёсатини амалга ошириш жараёнида уни сақлаб қолиш тобора қимматлашиб бормоқда, деб ёзади агентлик. 

Хитойда ноябрь ойи охирида кескин коронавирус чекловларига қарши оммавий норозилик намойишлари бошланди. Бунинг фонида баъзи шаҳар ҳокимиятлари чеклов чораларини юмшата бошлади.

Аввалроқ Хитойдаги энг бадавлат миллиардерларнинг бойлиги бир йил ичида 40 фоизга камайгани ҳақида хабар берилган эди.