Россия президенти Владимир Путин Мудофаа вазирлиги коллегиясининг кенгайтирилган йиғилишида Украинада содир бўлаётган воқеалар фожиалигини маълум қилди. Бу ҳақда «Kremlin.ru» хабар берди.
Президентнинг сўзларига кўра, бунга Россия сиёсати эмас, балки учинчи давлатлар сабабчидир.
«СССР парчаланганидан кейин Москва йиллар давомида Киев билан қардошлик муносабатларини ўрнатишга ҳаракат қилган, энергия ресурсларини етказиб, ‘деярли текин’ кредитлар берган. Россия ҳамиша цивилизациялашган дунёнинг бир қисми бўлишни хоҳлаган, аммо стратегик душманлар буни истамаган ва асрлар давомида Россияни парчалаб ташлашга ҳаракат қилган», — дейди у.
Путин Украинадаги вазият Москванинг геосиёсий рақиблари биринчи навбатда постсовет республикалари ва Украинанинг «миясини ювиш»га қарор қилгани натижаси эканини айтди.
«Бизни айблайдиган ҳеч нарса йўқ. Украиналикларни доимо қардош халқ сифатида кўрганмиз ва ҳозир ҳам шундай деб ўйлайман. Россия Украина билан яхши қўшничилик муносабатларини ўрнатиш учун уринишлар натижа бермади», — дейди Россия президенти.
Шунингдек, у бугунги кунда деярли барча йирик НАТО давлатларининг ҳарбий салоҳияти ва имкониятлари Россияга қарши фаол қўлланилаётганини айтди.
«Шундай бўлса-да, аскар, сержант ва офицерларимиз Россия учун мардона ва қатъият билан белгиланган вазифаларни босқичма-босқич ҳал қилмоқда», — дейди Путин.
У ҳарбий элитани НАТО тажрибаси ва тактикасини таҳлил қилиб, улардан армиянинг жанговар салоҳияти ва махсус хизматлар самарадорлигини оширишда фойдаланишга чақирди. Президент «махсус операция» тўлиқ бажарилишига яна бир бор ваъда берган.
Мавзуга доир: «Украинадаги урушни Россия бошламаган» — Путин (видео)
Изоҳ (0)