Андижон вилоятининг Жалақудуқ туманида фаолият юритувчи бир гуруҳ фермерлар «Дарё»га мурожаат қилиб, 2021 йилда тендер танловлари орқали деҳқончилик қилиш учун ер майдони ютиб олганини, аммо тендер ғолибларига эгалик ва фойдаланиш ҳуқуқини тасдиқловчи ҳоким қарори берилмаётганини, ҳокимлик бунга президент фармони тўсқинлик қилаётганини билдирганини айтмоқда.
«Дарё» мухбири мурожаатчилар билан суҳбатлашди.
Айтилишича, туман ҳокимлиги фермерларга ерга эгалик ҳуқуқни берувчи қарор чиқарилмаётганини президентнинг 2021 йил 8 июндаги «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида»ги фармони йўл қўймаётгани билан изоҳлаган.
«Жалақудуқ ҳаёти» газетасида тендерлар ўтказилиши ҳақида берилган эълондан сўнг ер олиш мақсадида туман қишлоқ хўжалиги бўлимига ҳужжатларимни топширганман. Тендер босқичма–босқич ўтказилган. Шунда 41-лойиҳада энг юқори балл тўплаб ғолиб бўлганман. Бироқ қарор чиқариш арафасида комиссия аъзоларининг фикрлари ўзгариб қолди. Шундан сўнг бу ҳақда туман ҳокими қарорини чиқариб беришларини сўраб бир неча бор, ҳам оғзаки ҳам ёзма аризалар билан мурожаат қилганман. Лекин натижа бўлмаяпти. Икки йилдан буён ваъда устига ваъда беришяпти холос. Бу орада президент фармони билан ерлар онлайн аукцион орқали олинадиган бўлди. Ҳокимлик шу қарорни асос қилиб оляпти. Комиссия аъзоларининг айримлари бизнинг тендерни қайта ўтказишларини айтяпти, — дейди мурожаатчи.Мурожаатчи фермер туман ҳокими уларга «Ушбу тендер ҳақиқий. Буни тан оламан, ер сизларники», деган гапни айтганини билдирмоқда.
Ҳокимнинг гапларига ишониб, йиллар давомида сув кўрмаган ерларга йирик миқдорда маблағ сарф қилиб сув чиқарганмиз. Лекин шу муддатгача ҳеч қандай натижа йўқлиги бор ишончимизнинг йўқолишига сабабчи бўляпти, — дейди Алишер Эргашев.Фермерлар Рустам Холматов, Акабек Нишонов, Ҳусниддин Элчибоевлар ҳам тендер орқали ер эгаларига айланган. Барчаси тендер комиссиясининг хулосасига ишониб, пул ва меҳнатини сарфлаган.
Менга тегишли ер майдони 12,40 гектарни ташкил этади. Шундан 6 гектарига Эрон хандон пистаси кўчатларини экканмиз. Қолгани экин майдонига эса ҳали Ўзбекистонда етиштирилмаган цитрус мева кўчатларини экмоқчимиз. Бироқ тендер орқали ютиб олган еримиз учун орадан салкам икки йил ўтган бўлса-да, ҳалигача ҳоким қарори чиқарилмагани хафсаламизни пир қиляпти, — дейди Рустам Холматов.«Саидазимбек ерлари» фермер хўжалиги раҳбари Акабек Нишонов масъуллар ер қайта онлайн савдога қўйилишини айтиб, савдода такрорий қатнашишларини айтганини билдирмоқда.
Ютиб олган ушбу еримизга 100 миллион сўмдан ортиқ маблағ сарф қилдик. Суғориш учун уч километр узоқликдан сув трубаларни тортиб келганмиз. Икки йил ичида бодом экиб, чиройли боғ яратдик. Энди раҳбарларнинг айтишича, бу ерлар қайтадан аукционга қўйилар экан. Аукционда ютолмасак меҳнатимизга куйиб қолмасмиканмиз, — дейди «Саидазимбек ерлари» фермер хўжалиги раҳбари Акабек Нишонов.Яна бир мурожаатчи Шаҳноза Ортиқованинг айтишича, ҳозирда фойдаланаётган ерига аслида 2008 йилдан буён эгалик қилиб келади. Бироқ 2020 йилдаги мақбуллаштириш даврида унга тегишли ер ҳокимлик заҳирасига олиниб, тендерга қўйилган. Тендерда шу ерни ютиб олган бўлса-да, ҳоким қарори чиқариб беришни пайсалга солмоқда.
Ҳозирда фойдаланаётган еримизни 2008 йилда тендер орқали боғдорчилик йўналишида иш ташкил қиламиз деб ютиб олганмиз. Йиллар давомида бу ерларни обод қилдик. Энди фойдага кира бошлаганимизда фермер хўжаликлари оптимизация қилиниб бошқа фермерларнинг ерларига қўшилиб кетди. Улар билан чиқиша олмадик. Шунинг учун ўз хоҳишимиз билан ерни қайта ютиб олиш мақсадида тендерда қатнашдик ва ютиб олдик. Лекин ҳокимлик қарор чиқариб бермасдан сарсон қилаяпти, — дейди Шаҳноза Ортиқова.Насиба Сотволдиеванинг айтишича, қарор чиққунича фойдаланиб туриши лозим бўлган ердан фойдаланишга ҳокимликда ишлайдиган «Жамолиддин» исмли масъулнинг жиянлари қаршилик қилмоқда.
Фермер Алишер Эргашевнинг таъкидлашича, у ҳоким қарори чиқартирилиб берилишини сўраб, Андижон вилояти маъмурий судига мурожаат қилган. Бироқ суд томонидан тендер танлови ҳужжатларининг маълум қисми тақдим этилмагани рўкач қилиниб, даъво аризаси рад этилган.2021 йилнинг апрель ойида ўтказилган тендер танловларида 3,5 гектар ерни ютиб олганман, аммо қарор йўқлиги учун у ерда ҳеч нарса қилолмаяпман.
Сабаби туман ҳокимлигида ишлайдиган «Жамолиддин» деганларининг жиянлари ўз еримда деҳқончилик қилишимга қаршилик қилишмоқда. Чунки, ёнимда уларнинг ҳам ери бор. Наҳотки менда фойдаланиш ҳуқуқи бўлмаса. Бундан ҳокимнинг ҳам хабари бор. Лекин ҳеч ким бу масалани ҳал қилиб бермаяпти. Бири унга бор, бошқаси бунга бор дейди. Бу ишинг ҳал бўлади ёки бўлмайди дейдиган бирор киши йўқ. Судраб-судраб шу кунгача келяпмиз, — дейди Насиба Сотволдиева.
Айни шу масала бўйича бормаган жойимиз, учрамаган одамимиз қолмади. Аммо бирорта ижобий натижа бўлмади. Аксинча, улар бизга ҳақиқатан ҳам тендерда ғолиб бўлганимизни, ердан бемалол фойдаланишимизни айтяпти. Қуруқ гаплар билан чекланиб қолишган. Ўзимизга тегишли ер майдонларида агротехник ишларни амалга оширдик, ерга ишлов бердик. Сув етиб бормаган жойларга катта миқдорда пул сарфлаб сув қудуқларини чиқардик. Лекин ҳалигача ҳокимият томонидан қарор чиқариб берилмади. Бу ҳолат икки йилдан буён давом этиб келмоқда. Адлия бўлими маслаҳати билан Маъмурий судга даъво аризаси киритдик. Суд ишимизни кўриб чиқиб керакли ҳужжатларнинг маълум қисмини тақдим этмаганлигимизни рўкач қилиб даъво аризамизни рад этди.Фермер президент қарори нотўғри талқин қилинаётганини, ҳокимлик ўз манфаати йўлида бундан фойдаланаётганини таъкидламоқда.78 нафар фермернинг қўлида тендерда ғолиб бўлганлиги ҳақидаги баённомалар бор. Тендернинг қонуний тартибда ўтганлигини прокуратура ҳам тасдиқлаганига қарамай негадир шу пайтгача ер учун тегишли қарор чиқариб бериш пайсалга солинмоқда, — дейди Алишер Эргашев.
Президентимиз томонидан халқ манфаатлари кўзланиб чиқарилган фармон халққа қарши ишлатиляпти. Сизларга мурожаат қилганимизнинг сабаби ҳам мана — шу. Муаммонинг энг қизиқ томони мазкур тендер президент қарори чиқишидан икки ой аввал тўлиқ якунланган, натижалар аллақачон эълон қилинган эди. Ҳокимият томонидан тегишли қарорнинг чиқариб берилмаганига юқоридаги фармон сабаб қилиб кўрсатилиши мантиққа тўғри келмаяпти. Маҳаллий ҳокимият вакилларининг яхши ишламаслиги ортидан биз каби оддий халқ жабр кўраётгани, асоссиз югур-югурлар билан икки йилдан буён сарсон бўлаётгани давлатимиз раҳбарига етиб борса, ўйлайманки, бизнинг муаммога ҳам ечим топилади. Биз чўлга айланиб улгурган ерларни обод қилиб оиламиз, Ватанимиз учун чин дилдан ишлаяпмиз. Ушбу ҳаракатларимизни қонунийлаштиришимизга эса маҳаллий ҳокимлик вакиллари имкон бермаяпти. Дардимизни кимдир эшитармикан?», — дейди Алишер Эргашев.«Дарё» мухбири мазкур масала юзасидан Жалақудуқ тумани ҳокимининг қишлоқ хўжалиги масалалари бўйича ўринбосари Абдумуталиб Позилов билан бир неча маротаба учрашишга ҳаракат қилди. Бироқ ҳоким ўринбосари учрашишни ҳам, телефон қўнғироқларига жавоб беришни ҳам истамади. Ҳоким Ҳикматилло Латипов эса фармон сабабли тендер танлови натижалари бўйича қарор қабул қилиш кечикканлигини билдириб, фермерлар ўз ерларида бемалол ишлайверишини, муаммо тез орада ҳал бўлишини билдирди, холос.
«Дарё» воқеалар ривожини кузатишда давом этади.
Изоҳ (0)