Ўзбекистон, Қозоғистон ва Озарбайжон автомобиль ишлаб чиқарувчилар конгломератига асос солди.
Қайд этилишича, 65 миллиондан ортиқ аҳолига эга бозорларни боғлайдиган конгломерат «Туркий автосаноат» деб номланган.
Маълумот учун, 21 декабрь куни Тошкентда бўлиб ўтган Ўзбекистон—Қозоғистон ҳудудлараро бизнес-форумида икки давлат ишбилармон доиралари ўртасидаги ўзаро ҳамкорликни ривожлантиришга қаратилган умумий қиймати 3 миллиард доллардан ортиқ бўлган келишувлар имзоланганди.
Конгломерат турли соҳаларда ишлайдиган бир нечта мустақил компаниялардан ташкил топган корпорация ҳисобланади. Улар саноат ёки технологик хусусиятларига боғлиқ бўлмаган турли корхоналар, фирмалар ва кредит ташкилотлари бирлашганда пайдо бўлади.
Аввалроқ Шавкат Мирзиёев таклифига биноан Қозоғистон президенти Қосим-Жўмарт Тўқаев давлат ташрифи билан Ўзбекистонга келгани ҳақида хабар берилган эди.
Ташриф дастурига мувофиқ, олий даражадаги музокараларда икки томонлама ва минтақавий аҳамиятга молик долзарб масалалар муҳокама қилинади. Саммит кун тартибидан Ўзбекистон—Қозоғистон стратегик шериклик ва иттифоқчилик муносабатларини янада чуқурлаштириш, ўзаро савдо ҳажмини ошириш, саноат кооперацияси бўйича ўзаро манфаатли қўшма лойиҳаларни илгари суриш, қишлоқ хўжалиги, транспорт ва логистика соҳаларидаги ҳамкорликни кенгайтириш, фаол ҳудудлараро ва маданий-гуманитар алмашинувларни давом эттириш каби асосий масалалар ўрин олган.
Давлат раҳбарлари бир қатор йирик инвестиция лойиҳаларини бошлаб бериши режалаштирилмоқда. Учрашувлар якунида амалий ҳамкорликнинг устувор йўналишлари бўйича икки томонлама битимларнинг салмоқли тўпламини қабул қилиш кўзда тутилган.
Изоҳ (0)