Ўзбекистонда йил бошидан бери қайси автомобиль энг кўп ишлаб чиқарилгани маълум қилинди

Ўзбекистонда 2022 йилнинг январь—ноябрь ойларида 294 293 дона енгил автомобиль ишлаб чиқарилган. Бу ҳақда Давлат статистика қўмитаси хабар бермоқда.

Ўн бир ойда Ўзбекистонда энг кўп Cobalt автомобили ишлаб чиқарилган — 90 239 дона. Cobalt 2021 йилнинг мос даврида ҳам энг кўп ишлаб чиқарилган автомобиль бўлган эди.

Бу борада иккинчи ўринда 80 478 дона билан Gentra автомобили бораётган бўлса, Damas 65 456 талик кўрсаткич билан учинчи бўлган. 

Январь—ноябрь ойларида шунингдек қуйидаги автомобиллар ишлаб чиқарилган:

• Nexia — 20 853 дона;
• Spark — 13 312 дона;
• Tracker — 4 916 дона;
• Volkswagen Caddy — 423 дона;
• махсус енгил автомобиллар — 18 616 дона.

Шунингдек, ноябрь ойининг ўзида 8 928 та Cobalt, 8 157 та Gentra автомобили ишлаб чиқарилган. 

Бироқ декабрь ойидан бошлаб Lacetti, Cobalt, Damas ва Лабо автомобилларига шартномалар қабул қилиш расман тўхтатилди.

Мавзуга доир: Ўзбекистон автомобиль бозори: ортиб бораётган талаб, энг кўп савдо амалга оширилган ҳудудлар ҳақида