Ўзбекистон Иқтисодий ҳамкорлик ташкилоти мамлакатлари Туризм вазирларининг IV йиғилишига раислик қилди. Тадбир доирасида Шаҳрисабз шаҳри 2024 йил ИҲТ туризм пойтахти сифатида эълон қилинди, деб «Дарё»га хабар бермоқда Туризм ва маданий мерос вазирлиги матбуот хизмати.
Иқтисодий ҳамкорлик ташкилоти (ИҲТ)га аъзо давлатлар Туризм вазирларининг IV йиғилиши онлайн форматда бўлиб ўтди. Тадбир ИҲТда 2022 йил – ўзаро алоқаларни мустаҳкамлаш йили концепциясига мувофиқ Ўзбекистон раислигида ўтказилди. Йиғилишда ташкилотга аъзо давлатларнинг туризм идоралари раҳбарлари ва ИҲТ Маданият институти президенти иштирок этди. Тадбирга Ўзбекистон бош вазири ўринбосари – туризм ва маданий мерос вазири Азиз Абдуҳакимов раислик қилди.
Маълумот учун, Иқтисодий ҳамкорлик ташкилотига Ўзбекистон, Туркманистон, Туркия, Эрон, Тожикистон, Покистон, Қирғизистон, Қозоғистон ва Озарбайжон мамлакатлари киради. IV йиғилиш кун тартибидан «ИҲТ минтақасида COVID-19 пандемиясидан кейин туризм соҳасини жадал тиклаш, хавфсиз ва барқарор ривожлантириш бўйича «Йўл харитаси», «ИҲТ туризм пойтахти» номзодлари, «ЭCО Vision 2025» мандатлари бўйича амалга оширилган ишлар тақдимоти ҳамда ИҲТга аъзо давлатларнинг «Самарқанд декларацияси» ўрин олди.
Йиғилиш доирасида Ўзбекистон томонидан илгари сурилган қатор ташаббус ва ҳужжатлар тасдиқланди. Булар:
1. Ўзбекистон президенти томонидан 28 ноябрь куни Ашхобод шаҳрида ўтган Иқтисодий ҳамкорлик ташкилотининг XV саммити доирасида илгари сурилган ташаббусга кўра, «ИҲТ минтақасида COVID-19 дан кейин туризмни жадал тиклаш, хавфсиз ва барқарор ривожлантириш «Йўл харитаси» тасдиқланди.
2. ИҲТга аъзо давлатлар бой тарихий ва маданий меросини эътироф этиш, туризм соҳасининг иқтисодий ва барқарор ривожланиш, халқлар ўртасидаги ҳамжиҳатликни таъминлашда асосий омил сифатида таъкидлаш, аъзо давлатлар томонидан амалга оширилган ишлар ва пировард мақсадларни белгиловчи «Самарқанд декларацияси» тасдиқланди.
3. Ташкилот аъзолари томонидан 2000 йиллик тарихга эга, UNЭСCО Бутунжаҳон мероси рўйхатига киритилган Шаҳрисабз шаҳри 2024 йилда ИҲТ туризм пойтахти сифатида маъқулланди.
«Барча юртдошларимизни Шаҳрисабз шаҳри 2024 йилда ИҲТ туризм пойтахти дея эълон қилингани билан табриклаймиз! Бу қарорнинг қабул қилинишида Ўзбекистонда туризм ва маданий мерос соҳаси ривожи йўлида амалга оширилаётган ислоҳотлар, Шаҳрисабз шаҳрининг бой тарихи ва маданий мероси, Ипак йўлида туризмнинг ривожланишидаги ўрни ва соҳани барқарор ривожлантириш салоҳияти инобатга олинди. Зеро, Шаҳрисабз 2000 йиллик тарихга эга бўлиб, UNЭСCО нинг Бутунжаҳон мероси репрезентатив рўйхатига киритилган», — деди Азиз Абдуҳакимов.
Ўз навбатида, Шаҳрисабзнинг ушбу мақомни олишини кенг миқёсда нишонлаш кўзда тутилган. Қолаверса, шаҳарда ва бутун Қашқадарё вилоятида туризм инфратузилмасини яхшилаш, экотуризм, этнотуризм ва бошқа йўналишларда салоҳиятни юксалтириш, ҳудуднинг номоддий меросини кенг очиб берувчи маданий тадбирлар, туризм тадбиркорлиги, шу жумладан, ёшларнинг фаоллигини ошириш бўйича алоҳида дастур амалга оширилиши кўзда тутилган.
Тадбир якунида ИҲТга аъзо давлатлар делегациялари раҳбарлари томонидан Ўзбекистон раислигида илгари сурилган таклифлар ва қабул қилинган ҳужжатлар туризм соҳасидаги халқаро ҳамкорликни янги поғонага олиб чиқишига ишонч билдирилди.
Изоҳ (0)