Президент Шавкат Мирзиёев иштирокида ўтказилган видеоселекторда мамлакатда хусусий секторда фаолият кўрсатаётган 232 минг корхонада ишчилар сони бор-йўғи бир кишидан иборат эканлиги қайд этиб ўтилди. Жумладан, Наманган вилоятининг Наманган туманида бундай корхоналар сони 70 фоизни ташкил этмоқда. «Дарё» мухбири Азизбек Абдувалиев туман ҳокими Садриддин Мўминов билан учрашиб, селектордан чиқарилган хулосалар ҳақида сўради.
«Наманган туманида фаолияти барчага ибрат бўлишга арзигулик хусусий корхоналаримиз кўп. Масалан, Тошбулоқдаги сув насослари ва электр двигателлари ишлаб чиқариладиган ‘Наммоторсервис’ корхонасида 90 нафар ходим ишлаб келмоқда, ўртача ойлик 4 миллион сўм. Мономарказда ёшларни касбга тайёрлаш ва ўқитиш ишларини ҳам ташкил этишган. Трикотаж маҳсулотлари, ипак ва мато ишлаб чиқарадиган Golden Silk корхонасида эса 100 нафарга яқин ходим ишламоқда, уларнинг учдан бири хотин-қизлар. Ўртача ойлик иш ҳақи 2 миллион сўм, йиллик экспорти 1,5 миллион долларга етди.
Селектордан чиқарган асосий хулосам шу бўлдики, мана шундай ишчи-ходимларини яширмай ҳалол ишлаётган, солиқ тўлаётган, туман иқтисодиётига салмоқли ҳисса қўшаётган хусусий корхоналарни рағбатлантиришимиз, қўллаб-қувватлашимиз ва бошқа тадбиркорларга намуна қилишимиз керак экан.
Қолаверса, топширилаётган солиқ ва статистик ҳисоботларни жиддий таҳлил қилишни ҳам ўрганишимиз керак. Шунда селекторда кўрсатилган камчиликлар олдинроқ ўзимизга аён бўлиб, уларнинг олдини олиш ёки тезлик билан бартараф этиш чоралари кўрилган бўларди», — дейди Садриддин Мўминов.
Маълумот учун, Наманган туманида бугунги кунда 2 мингга яқин кичик тадбиркорлик субъекти фаолият кўрсатмоқда. Улардан 443 таси қишлоқ хўжалиги, 438 таси саноат, 123 таси қурилиш ва таъмирлаш, 481 таси савдо, 42 таси умумий овқатланиш, 65 таси транспорт, 26 таси ахборот-коммуникация, 105 таси соғлиқни сақлаш, 64 таси таълим ва спорт, 71 таси автомобилларга техник хизмат кўрсатиш соҳаларида фаолият кўрсатади, 131 таси эса бошқа турдаги корхонадан иборат.
Мавзуга доир: Учқўрғон тумани ҳокими: «Яширин иқтисодиётга барҳам бериш учун тадбиркорлар билан кўпроқ мулоқотда бўлиш кераклигини англадик»
Изоҳ (0)