Бугун, 17 декабрь куни Uzbekistan Airways томонидан харид қилинган тўртинчи Airbus 321neo самолёти «Тошкент» аэропортининг маҳаллий авиайўналишлар терминалига келиб қўнди. Авиация анъаналарига мувофиқ, янги ҳаво кемаси ўт ўчириш машиналари ёрдамида сув аркаси билан кутиб олинди.
UK32105 рўйхатга олиш рақамини олган ҳаво кемаси Airbus заводларидан бири жойлашган Гамбург шаҳридан (Германия) 6 соат-у 30 дақиқа ичида тўғридан-тўғри Тошкентга Uzbekistan Airways экипажи Муроджон Ғуломов ва Владислав Аргов бошқарувида олиб келинди.
Янги лайнерни терминалда Транспорт вазирлиги вакиллари, авиакомпания ходимлари, оммавий ахборот воситалари вакиллари, авиаспоттерчилар кутиб олишди. 188 йўловчига мўлжалланган A321neo самолёти узоқ масофалар ҳамда маҳаллий авиақатновларда эксплуатация қилинади. Самолётнинг максимал учиш вазни 97 тонна ва 6850 км бўлган масофагача парвоз қилиши мумкин.
Янги ҳаво кемаларини харид қилиш йўналишлар тармоғини кенгайтириш ва йўловчиларни ташиш ҳажмини оширишга ёрдам беради. Авиакомпания ҳаво кемалари паркини унификациялаш Uzbekistan Airways АЖ да трансформация жараёнларини жадаллаштириш бўйича «йўл харитаси»да белгилаб берилган. Uzbekistan Airways янги йўналишларни очишни, Европа ва Осиё мамлакатларига аввалги машҳур бўлган йўналишларни қайта тиклашни режалаштирмоқда. Авиакомпания ҳаво паркини янги A321neo ҳаво кемалари билан тўлдириш эса ушбу амалга ошириладиган йўналишларда яхши ёрдам беради.
«Самолёт 188 йўловчига мўлжалланган, шундан 16 та ўрин бизнес, 172 та эконом тоифани ташкил этади. Хабарингиз бор, Uzbekistan Airways томонидан 2021 йилнинг сентябридан бошлаб камхаржли ташувларни амалга ошириш бошланган. Сабаби йўловчиларнинг бизнесдан кўра эконом тоифадаги чипталарга талаби ошган. Талабдан келиб чиққан ҳолда компания томонидан айнан камхарж самолётларни сотиб олишга қарор қилинди. 2022 йил якунигача яна бир шундай самолёт харид қилиш режалаштирилган. Бундан ташқари президентимиз Шавкат Мирзиёевнинг Францияга амалга оширган юқори даражадаги ташрифлари доирасида Uzbekistan Airways ва Airbus ўртасида, Airbus оиласининг 12 та янги самолётини (шу жумладан A320neo ва A321neo) сотиб олиш бўйича 2029—2030 йилларда етказиб бериш шарти билан келишувга эришилган. Мана шу 10 йил ичида биз мазкур самолётларни ҳам қабул қилиб олишимиз кўзда тутилган.
Янги самолётларнинг харид қилиниши парвозлар харитасига таъсир этади. Агар ҳозирда дунёнинг 40 та шаҳрига парвозлар амалга ошираётган бўлсак, бу келгуси йилда энг камида яна 10 та шаҳар қўшилади, деганидир».
Камола Икромова, Uzbekistan Airways АЖ матбуот хизмати раҳбари
Эслатиб ўтамиз, жорий йилнинг ноябрида Uzbekistan Airways ва Airbus ўртасида Airbus оиласига тегишли 12 та янги ҳаво кемасини (жумладан, A320neo ва A321neo) 2029—2030 йилларда етказиб бериш шарти билан сотиб олиш бўйича навбатдаги шартнома имзоланган эди. Тадбир давомида иштирокчилар ва оммавий ахборот воситалари вакиллари янги авиалайнер ва унинг техник хусусиятлари билан яқиндан танишиш имконига эга бўлди. Тадбирда фуқаро авиацияси соҳаси ходимларининг фарзандлари ҳам иштирок этди.
Изоҳ (0)