«Ҳокимларнинг рейтингини ажрашишлар сонига боғлаб қўйдик» – профессор Барногул Санакулова

«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 11-сони мавзуси «Тазйиқ ва зўравонлик — номардлик» бўлиб, дастур меҳмони сифатида иқтисод фанлари доктори, профессор Барногул Санакулова таклиф этилди.

Жонли эфир мобайнида Фурқат Маҳмудхўжаевнинг Барногул Санакуловага ўзи яшайдиган маҳалла раиси бўлиш ҳақидаги таклифига жавобан, профессор ўзини ўқитувчилик, илм-зиё тарқатишда кўриши ва ундан шу соҳада кўпроқ фойда бўлишини таъкидлади. Лекин «парда ортида» туриб стратегик қарорлар қабул қиладиган ва майдонга чиқмайдиган жамоада ишлашга ҳамиша тайёрлигини, бундай жамоа маҳалла раисидан тортиб, ҳоким, вазир, президентда ҳам бўлиши кераклигини айтди.

«Масалан, биз жуда ёмон кўрадиган, рейтингларда энг қуйи поғонада турадиган ҳокимлар бор. Уларнинг PR кампанияси аёллар ва болалар зўравонлигига қарши курашиш кейси билан ишлаб, бу борада чора-тадбирлар кўра бошласа, кафолат бераман, шу ҳокимни яхши кўриб қолишади. Майли, пиар бўлса ҳам, шунинг натижасида юзтадан элликта аёлнинг масаласи ҳал қилинса, олдинга бир қадам қўйилган бўлади. Ҳоким ҳам бунинг мазасини, бу орқали унинг репутацияси жойига тушаётганини билгач, чин дилдан қилинган дуолар, қувонган кўзларни кўргач, яхши, виждонли ҳокимга айланади, деб ҳисоблайман.

Биз эса ҳокимнинг рейтингини ажрашишлар сонига боғлаб қўйдик. Менга бир ҳоким: «Мен бу тартибга қаршиман, лекин нима қилай, ажрашишлар сони қанчалик кўп бўлса, рейтингим шунчалик пасайяпти, масъул ходимларим икки инсон бирга яшай олмаслигини, келажакда зўравонлик жинояти юз бериши мумкинлигини билиб турса-да, уларни ажратмасликка ҳаракат қилади. Чунки ажрацак, рейтинг тушиб кетаверади», – деб айтди.

Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.