Ўзбекистон мусулмонлари идораси раиси, муфтий Нуриддин Холиқназаров гиёҳвандлик иллати, унга қарши чоралар, бундай моддалар савдоси билан шуғулланаётган шахсларга етадиган зарарлар ҳақида гапирди.
Муфтийнинг сўзларига кўра, ҳозирги кунда гиёҳвандлик иллатига мубтало бўлганлар сони дунё бўйлаб 500 миллионни ташкил этмоқда. Ҳар куни минглаб одамлар шу вабо сабаб ҳаётдан кўз юммоқда. Қанча-қанча оилалар шунинг ортидан пароканда бўляпти, ногирон болалар туғиляпти.
Қуйида Мусулмонлар идораси раисининг ушбу мавзу юзасидан айтган фикрлари тўлиқ ҳолда келтирилади.
«Қуръони каримда Аллоҳнинг ‘Ўзингизни ўз қўлингиз билан ҳалокатга ташламанғ, деган оят калимаси бор. Инсон ўзини ўзи ҳалокатга ташлаши мумкин эмас. Агар шу катта гуноҳ бўлади. Ўз жонига қасд қилиш деганда биз доим суиқасд қилиш, бирор кўриниб турган суиқасдни тушунамиз. Лекин аслида гиёҳвандлик ҳам инсоннинг ўз жонига қасд қилиши билан тенгдир.
Исломнинг 5 та олий мақсади деган нарса бор: инсонларнинг ҳаётини, ақлини, мол-дунёсини, насабини ва динини муҳофаза қилиш. Дин мана шу 5 мақсад устига қурилган. Қайси ғоя ёки амал мана шу мақсадларга қарши бўлса, бу инсон Исломга қарши чиқаётган бўлади. Уламолар гиёҳвандликни мана шу 5 мақсаднинг ҳаммасига зид деб билади.
Биринчидан, гиёҳвандлик инсонларнинг ҳаётига зомин бўлади. Бир пайтлар оддийгина кўкнори орқали гиёҳвандлик билан шуғулланилган бўлса, у бугунги кунда кимёвий таркибга айланди. Ҳозир махсус дорилар пайдо бўлди, одамлар шундай дориларни сотиб олиб, ўз ҳаётига тажовуз қиляпти.
Иккинчидан, бу иллат одамларнинг молига таъсир ўтказяпти. Одамлар бу иллат учун молини исроф этяпти, ҳаром йўлга сарфлаяпти. Шу даражага бориб қолиняптики, бу иллатга йўлиққанлар пули қолмагач, уйидаги бор нарсани олиб чиқиб сотяпти. Бола-чақасининг ҳам ризқини ўйламаяпти. Ҳатто ота-онаси, яқинларининг пулини ўғирлаб, шу йўлга сарфлаётганлар бор.
Яна бир мақсад одамларнинг ақлини муҳофаза қилиш бўлиб, бугунги кунда гиёҳвандлик одамларни ақлидан айиряпти. Уламолар айтадики, гиёҳвандлик вақтинча мажнун бўлиш, ақлдан кетишга олиб келади. Шу пайтда у исталган жиноятни қилиб қўйиши мумкин.
Кейинги мақсад — насабни ҳимоялаш. Насабнинг пок бўлиши, келажак авлоднинг соғлом туғилишини муҳофаза қилиш Исломнинг олий мақсадларидан биттаси ҳисобланади. Бугун гиёҳвандлик ортидан қанчадан қанча бола ногирон туғилмоқда. Демакки, гиёҳвандлик бу мақсадга ҳам қарши.
Яна бир мақсадлардан бири — динни муҳофаза қилиш. Аммо бу иллатга киришганларда дин қоладими? Динга амал қилиш уёқда турсин, уни тасаввур этишдан ҳам узоқлашиб қолади. Ўз-ўзидан кўриниб турибдики, гиёҳвандлик Исломнинг энг олий деб билган 5 мақсадининг барчасига қарши.
Росулуллоҳ соллаллоҳу алайҳи ва салламнинг бир ҳадислари бор. Унда шундай дейилади: ‘Сизлардан кимки бир мункар (ножоиз) ишни кўрса, уни қўли билан ўзгартирсин (қайтарсин). Агар бунга қодир бўлмаса, унда тили билан (қайтарсин). Бунга ҳам қодир бўлмаса, қалби билан (қайтарсин). Бу (қалби билан мункар-ҳаром ишни қайтариш) эса иймоннинг энг заифидир’. Шу даражагача бормаслик керак.
Гиёҳвандлик қайтариш керак бўлган ишларнинг энг юқори даражасида туради. Уларни қўли билан қайтарадиганлар махсус хизматлар бўлиб, яъни уларга жазо бериш назарда тутилади. Биз эса тилимиз билан бу ишдан қайтарамиз: гапирамиз, огоҳлантирамиз, керак бўлса, тегишли жойларга айтиб, даволаттирамиз. Лекин ҳозир бизда бефарқлик. Атрофда шундай инсонларни кўрсак, кўрмаганга, эшицак ҳам, эшитмаганга олиб юраверамиз. Шу нарса хато.
Ҳозир биз энг кўп хавотир оладиган жиҳатимиз — ёшларнинг психотроп моддалардан фойдаланишлари. Аслида бу дорилар руҳий касалларни даволаш учун чиқарилади. Шунингдек, бундай дорилар фақатгина махсус рухсатнома билан, рухсат этилган жойлардагина сотилиши керак. Агар соғлом одам бу дориларни қабул қилса, вақтинча руҳий касалга айланади. Тўхтовсиз қабул қилавергач, ўзини бошқара олмай қолиб, ё ўзининг, ё бирор яқинининг жонига қасд қилар экан.
Ёшлар бу дориларни қаердан оляпти? Кўчада билдирмасдан сотаётганлар, ўзига алоҳида макон қилиб олганлар йўқ дейсизми? Шу ердан оляпти ёшлар. Ана шу сотувчиларга айтамизки, гиёҳванд моддани истеъмол қилган ҳам, уни сотган ҳам, уни олиб келишда ёрдам берган ҳам баробар гуноҳкор бўлади. Сотган дорингизни қайсидир бола истеъмол қилиб, шунинг ортидан нима жиноят қиладиган бўлса, сиз ҳам қиёматда у билан тенгма-тенг жавоб берасиз. Шунинг ортидан бола боқиб, тирикчилик қилаётганлар, Аллоҳдан уялинг. Эртага сизнинг авлодингиздан ҳам мана шу дардга мубтало бўлганлар чиқиб қолиши мумкин.
Бундай савдо билан шуғулланаётганларни кўрган одам ҳам керакли жойларга айтиб, тўхтатиши керак. Бу гуноҳ ёки чақимчилик бўлмайди. Аслида, буни айтмаслик гуноҳ. Чунки ўша битта таблеткани ичиши билан бир кишининг жонига қасд қилиши, бир одамни ўлдириб қўйиши ёки бошқа жиноятлар қилиб қўйиши мумкин. Ёки ўзи ҳалокатга учраши мумкин. Шунинг олдини олиш — ҳаммамизнинг вазифамиз. Бефарқ бўлмаслигимиз керак.
Ўзбекистон Мусулмонлари уламолар кенгашининг алоҳида қарори, алоҳида фатвоси шуки, ким гиёҳвандлик савдоси билан шуғулланётган бўлса, унинг топган моли ҳаром, бола-чақасига ҳаром егизаётган бўлади. Бундан топган молидан қилинган ҳеч бир эҳсони қабул бўлмайди».
Мавзуга доир:
- «Баъзи йигитларнинг онаси ‘Ё мени танла, ё аёлингни’, деб танлов қўйяпти. Аслида онанинг шундай шарт қўйиши гуноҳ» — Нуриддин Холиқназаров
- «Ҳозир ҳамманинг ўз ‘шайхи’ бор Google деган. Ёзяпмиз, жавоби чиқса, мана шу тўғри деб ўйлаяпмиз» — Нуриддин Холиқназаров
- «Аллоҳ исроф қилгувчиларни яхши кўрмайди. Ҳаммаси учун жавоб берамиз» — Муфтий Нуриддин Холиқназаров
- «Коррупционэрларни лаънатлаймиз, лекин уларни порахўр қилаётган биз ўзимиз-ку» — Муфтий Нуриддин Холиқназаров
Изоҳ (0)