Ўзбекистон аҳолисининг интернет хизматидан фойдаланувчилари сони 31 миллиондан ортди. Бу ҳақда Қонунчилик палатасида 14 декабрь куни бўлиб ўтган навбатдаги «Ҳукумат соати»да айтиб ўтилди.
Йиғилишда депутатлар «Рақамли Ўзбекистон – 2030» стратегиясини билан белгиланган вазифаларнинг ижросини таъминлаш борасида олиб борилаётган ишлар тўғрисида»ги масалани муҳокама қилди. Кун тартибидаги масала юзасидан депутатларнинг саволларига ахборот технологиялари ва коммуникацияларини ривожлантириш вазири Шерзод Шерматов жавоб берди.
Вазирнинг қайд этишича, халқаро ва шаҳарлараро телекоммуникация тармоғини ривожлантириш мақсадида халқаро интернет тармоғига уланишнинг умумий ўтказувчанлик қобилияти 2,6 баробар оширилиб, 3 200 Гбит/секундга етказилган. Магистрал телекоммуникация тармоқлари ўтказувчанлик қобилияти вилоятлараро даражада 600 Гбит/секундга, туманлараро даражада эса 60 Гбит/секундга етказилган.
Бу билан республикада интернет тезлигини оширишга, оператор ва провайдерларга Интернет хизматлари учун тарифнинг 2021 йил бошига нисбатан 25 фоизга арзонлаштиришга эришилди. Шунингдек, 2021—2022 йилларда қўшимча 102 минг км оптик-толали алоқа линияларини қуриш орқали уларнинг умумий узунлиги 170 минг километрга етказилди.
2020 йил якунида 2,7 миллионта уй хўжалиги, тадбиркорлик субъектлари ва ижтимоий соҳа объектларининг кенг полосали Интернетга уланиш имконияти мавжуд бўлган бўлса, сўнгги икки йилда қўшимча 1,7 миллион кенг полосали портлар ўрнатилиши натижасида жами 4,4 миллионта уй хўжалиги, тадбиркорлик субъектлари ва ижтимоий соҳа объектларининг кенг полосали Интернетга уланиш имконияти яратилди.
Аҳолининг интернет хизматидан фойдаланувчилари сони эса 31 миллиондан ортди. Шундан мобил интернет фойдаланувчилари сони 29,5 миллионни ташкил этади. Шунингдек, сўнгги икки йилда 22 300 та қўшимча таянч станцияси ўрнатилиб, уларнинг умумий сони 54 мингтага етказилди. Республика бўйича мобил алоқа қамрови даражаси 99 фоизга, кенг полосали мобил Интернет қамрови 98 фоизга етказилди.
Мавзуга доир: Ўзбекистонда ижтимоий тармоқ ва мессенжерлардан фойдаланиш кўрсаткичлари маълум бўлди
Изоҳ (0)