АҚШ Сербия кучларининг Косово шимолига қайтарилишига қарши чиқди

АҚШнинг Ғарбий Болқон бўйича махсус вакили Габриэль Эскобар Вашингтон серб кучларининг Косово шимолига қайтишига қатъиян қарши эканини маълум қилди.

«Биз буни қатъиян рад этамиз. Буни умуман қўллаб-қувватламаймиз», — дея унинг сўзларидан иқтибос келтирган Сербиянинг RTS телеканали. Эскобар воқеалар бундай ривожланишини кутмаётганини айтди.

«Шуни эслатиб ўтишни хоҳлардимки, Косово хавфсизлик соҳасида Вашингтондан жиддий кафолатлар олган, бу Косоводаги тинчликпарвар кучларда (KFOR) АҚШнинг ҳам иштирокидан намоён», — дея қўшимча қилди Эскобар.

Косовода яна кескинлашув

10 декабрь куни, асосан, серблар истиқомат қиладиган Косово шимолида баррикадалар пайдо бўла бошлади, бундан ташқари, аҳоли чегара пунктларига борадиган йўлларни тўсиб қўйди. Тўполонга асли серб бўлган косоволик полициячи Деян Пантичнинг ҳибсга олиниши сабаб бўлган. Бир неча кун олдин у ва унинг айрим ҳамкасблари Косово полициясида хизматни давом эттиришдан бош тортган ва Косовска-Митровица шаҳридаги лавозимларини тарк этганди.

Қисман тан олинган Косово ҳукумати 11 декабрь куни НАТОнинг Косоводаги контингенти қўмондонлигига республика шимолидаги баррикадаларни олиб ташлаш талаби билан мурожаат қилди. Улар, кечгача жавобни кутиши, талаб рад этилган тақдирда баррикадаларни Косово хавфсизлик кучлари демонтаж қилиши мумкинлигини таъкидлади. Шундан сўнг Сербия президенти Александр Вучич Сербия Хавфсизлик кенгаши йиғилишини чақирди.

Вучич НАТО тинчликпарвар кучларидан Косовога серб ҳарбийлари ва полициясини жойлаштиришга рухсат беришни сўрамоқчилигини маълум қилди.

Косовода 120 мингга яқин серблар бор, қисман тан олинган республиканинг 1,8 миллионга яқин аҳолисининг катта қисми этник албанлар, дея эслатди AFP. Шу билан бирга, Шимолий Косовода (Сербия автоном вилояти) аҳолининг аксарияти серблардир.