Қашқадарё вилоятининг Кўкдала туманида ўз хизмат вазифасини бажараётган МИБ ходимлари қарздор фуқаролар ва уларнинг яқинлари томонидан калтакланди. Бу ҳақда «Дарё»га хабар берган МИБнинг вилоят бошқармаси ахборот хизмати раҳбари Гулноза Дилмуродовага кўра, ҳолат юзасидан Кўкдала туман прокуратураси томонидан жиноят иши қўзғатилган.
Маълум бўлишича, 2022 йилнинг 9 декабрь куни тахминан соат 11:00 лар атрофида Бюронинг Кўкдала туман бўлими давлат ижрочилари Э.И. ва У.Ю. Жиноят ишлари бўйича Чироқчи туман судининг 2022 йил 22 апрелдаги қарорига кўра, жавобгар ака-укалар — Р.Э. ва Р.Э.ларнинг ҳисобидан даъвогар А.Қ.нинг фойдасига жавобгарларнинг ҳар биридан 4 миллион 805 минг 400 сўмдан жами 9 миллион 610 минг сўм моддий ва маънавий зарар ундириш учун борган.
Қарздор Р.Э. МИБ ходимлари олдига бошқарувида бўлган Nexia автомобилида келган пайтда МИБ ходимлари қарздорлик эвазига автомобилни хатламоқчи бўлган. Бунга жавобан қарздор Р.Э. ва унинг яқин қариндошлари ижро ҳаракатларини амалга ошираётган давлат ижрочиларига қўпол муносабатда бўлиб, баланд овозда уларни ҳақорат қилган. Шунингдек, уларни уриб, тепиб ижро ҳаракатларини якунлашга қаршилик кўрсатган. Бу ҳам етмагандек, қарздор Р.Э. автомашинани бошқариб, ҳодиса жойидан кетиб қолган.
Мазкур ҳодиса юзасидан Кўкдала тумани прокурори томонидан А.Элмуродовга нисбатан Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, дастлабки тергов ҳаракатлари олиб борилмоқда, — дейди Гулноза Дилмуродова.
Мавзуга доир: Самарқандда ўқувчининг онаси «замдиректор»ни калтаклади
Изоҳ (0)