Тошкент шаҳрига белгиланган истеъмол топшириғини бажариш, ишлаб чиқаришдаги технологик жараёнлар тўхтаб қолишининг олдини олиш мақсадида пойтахтнинг барча туманларида кунига 2 соатдан навбат билан электр энергияси ўчирилади. Бу ҳақда «Ҳудудий электр тармоқлари» АЖ ахборот хизмати маълум қилди.
Қайд этилишича, ҳаво ҳарорати совиши билан энергия манбаларига эҳтиёж сезиларли ортиб бормоқда, шу жумладан, электр энергиясига бўлган талаб ҳам. Умумэнерготизимда катта аварияли ҳолатлар содир бўлишининг олдини олиш мақсадида диспетчерлик хизматлари томонидан истеъмол балансини сақлашга қаратилган чоралар кўрилишини тақозо қилади. Шунингдек, соҳа ходимлари олдида турган долзарб масала аҳоли ва ижтимоий объектларни барқарор электр энергияси билан таъминлаш бўлиб, ҳудудларда бу борада тизимли ишлар олиб борилмоқда.
Юқори истеъмол вақтларида Тошкент шаҳрига белгиланган истеъмол топшириғини бажариш, электр энергиясини ишлаб чиқариш ва истеъмол қилиш мувозанатини ушлаб туриш ҳамда истеъмолчилар таъминотида тартибсиз узилишларни бартараф этиш мақсадида фақат фавқулодда ҳолатда пойтахт ҳудудларида туман ҳокимликлари билан келишган ҳолда электр энергияси таъминотига қисқа муддатли чекловлар киритилади.
Ушбу чеклов графиги фақат фавқулодда, об-ҳавонинг кескин совиб кетиши оқибатида авария ҳолатларининг олдини олиш учун истеъмол ортиб кетгандагина амал қилади.
Тармоқлар, подстанцияларда авариялар, аварияларни тиклаш, режавий таъмирлаш ишлари олиб борилганда ҳамда энерготизимда фавқулодда вазият юзага келганда ушбу чеклов жадвалларида кўрсатилган соатлардаги тармоқлардан ташқари қўшимча тармоқлар ўчирилади ва бу ҳақда хабар берилади.