Женевада Ўзбекистоннинг ЖСТга аъзо бўлиш жараёнини янада жадаллаштириш бўйича келишувга эришилди. Бу ҳақда Инвестициялар ва ташқи савдо вазирлиги матбуот хизмати хабар қилди.
Маълум қилинишича, инвестициялар ва ташқи савдо вазири ўринбосари, Жаҳон савдо ташкилоти билан ишлаш бўйича музокаралар гуруҳи раҳбари Бадриддин Абидов Ўзбекистоннинг ташкилотга аъзо бўлиши доирасида ЖСТга аъзо давлатлар билан бир қатор икки томонлама музокаралар ўтказиш ҳамда UNCTAD/ЖСТ халқаро савдо маркази (ХСМ) томонидан ташкил этилган Ташқи савдо стратегиялари форумида иштирок этиш мақсадида 7—9 декабрь кунлари Женевада бўлди.
Ташриф давомида АҚШ, Европа Иттифоқи, Хитой, Саудия Арабистони, Қатар, Туркия, Сингапур ва бошқалар каби 14 давлатнинг Ташкилотдаги дипломатик ваколатхоналари раҳбарлари ва экспертлари билан Ўзбекистоннинг ЖСТга аъзо бўлиши юзасидан навбатдаги музокаралар олиб борилди.
Шунингдек, ЖСТ бош директори ўринбосари Ж-М.Погам ва ташкилот котибиятининг қўшилиш бўлими бошлиғи М.Ошикава билан учрашувлар бўлиб ўтди.
Музокаралар чоғида Ўзбекистоннинг ЖСТга аъзо бўлиши бўйича ишчи гуруҳининг 6-йиғилишини ташкил этишга тайёргарлик кўриш бўйича амалга оширилаётган ишлар, бу жараённи янада жадаллаштириш бўйича амалий чора-тадбирлар билан боғлиқ масалалар муҳокама қилинди. ЖСТга аъзо давлатлар билан бозорларига республика товар ва хизматларининг чиқиши бўйича алоҳида музокаралар олиб борилди.
Давлатлар вакиллари ва ЖСТ котибияти таъкидлашича, Ўзбекистон Ташкилотга аъзо мамлакатларга ишчи гуруҳнинг 6-йиғилишини ташкил этиш учун барча зарур янги ҳужжатларни, жумладан манфаатдор давлатларнинг саволларига ёзма жавобларни, миллий қонунчиликни ЖСТ қоидаларига мувофиқлаштиришга қаратилган чоралар режаси, санитария ва фитосанитария чоралари, савдодаги техник тўсиқлар, божхона қийматини баҳолаш, интеллектуал мулк, товарлар импортини лицензиялаш ва бошқа масалалар бўйича янгиланган ҳужжатларни тақдим этган.
Музокаралар якунида Ўзбекистоннинг ЖСТга аъзо бўлиш жараёнини янада жадаллаштириш, жумладан ташкилотнинг тадбирлар жадвалига мувофиқ 2023 йил бошида ишчи гуруҳнинг 6-йиғилишини ўтказиш бўйича келишувга эришилди.
Мавзуга доир:
Изоҳ (0)