АҚШ Ўзбекистон ва Қирғизистон давлат чегарасини демаркация қилиш тўғрисидаги битимга эришганини олқишлади. Бу ҳақда АҚШ давлат котиби Энтони Блинкен Владимир Норов билан музокаралар ўтказиш олдидан айтиб ўтди.
«Менимча, бу минтақадаги ва ундан ташқаридаги кўпчиликка бундай масалаларни ҳал қилишда дипломатия имкониятларининг аҳамияти тўғрисида кучли сигнал юборади», — деган Энтони Блинкен.
АҚШ давлат департаменти раҳбари Ўзбекистон томонидан Марказий Осиёда ўзаро ишонч ва англашув муҳитини мустаҳкамлаш йўлида олиб борилаётган минтақавий сиёсатга юксак баҳо берган.
Мавзуга доир: 30 йиллик муаммо ҳал бўлди: Мирзиёев Қирғизистон билан чегара ва Андижон сув омборига оид қонунларни имзолади
ТИВ матбуот хизматининг хабар қилишича, Энтони Блинкен Ўзбекистонда амалга оширилаётган ислоҳотларни ижобий баҳолаб, Америка томони уларни амалга ошириш жараёнида ҳар томонлама ёрдам беришга тайёрлигини билдирди. АҚШ давлат департаменти раҳбари республиканинг инсон ҳуқуқларини ҳимоя қилиш, шу жумладан диний эркинликларни таъминлаш, одам савдосига қарши курашиш ва мажбурий меҳнатга барҳам бериш борасида эришган ютуқларини алоҳида таъкидлади.
Ўзбекистон ташқи ишлар вазири Владимир Норов бошчилигидаги делегация 12 декабрь куни Вашингтонга ташриф буюрганди. Делегация Ўзбекистон ва АҚШ ўртасидаги стратегик шериклик мулоқотининг иккинчи йиғилишида иштирок этади. Ташриф доирасида Владимир Норов АҚШ давлат котиби Энтони Блинкендан ташқари мамалакатнинг бошқа расмийлари билан ҳам музокаралар ўтказади.
Мавзуга доир: Ўзбекистон АҚШ билан фаол ва конструктив сиёсий мулоқотни давом эттиради
Изоҳ (0)