AQSH O‘zbekiston va Qirg‘iziston davlat chegarasini demarkatsiya qilish to‘g‘risidagi bitimga erishganini olqishladi. Bu haqda AQSH davlat kotibi Entoni Blinken Vladimir Norov bilan muzokaralar o‘tkazish oldidan aytib o‘tdi.
“Menimcha, bu mintaqadagi va undan tashqaridagi ko‘pchilikka bunday masalalarni hal qilishda diplomatiya imkoniyatlarining ahamiyati to‘g‘risida kuchli signal yuboradi”, — degan Entoni Blinken.
AQSH davlat departamenti rahbari O‘zbekiston tomonidan Markaziy Osiyoda o‘zaro ishonch va anglashuv muhitini mustahkamlash yo‘lida olib borilayotgan mintaqaviy siyosatga yuksak baho bergan.
Mavzuga doir: 30 yillik muammo hal bo‘ldi: Mirziyoyev Qirg‘iziston bilan chegara va Andijon suv omboriga oid qonunlarni imzoladi
TIV matbuot xizmatining xabar qilishicha, Entoni Blinken O‘zbekistonda amalga oshirilayotgan islohotlarni ijobiy baholab, Amerika tomoni ularni amalga oshirish jarayonida har tomonlama yordam berishga tayyorligini bildirdi. AQSH davlat departamenti rahbari respublikaning inson huquqlarini himoya qilish, shu jumladan diniy erkinliklarni ta’minlash, odam savdosiga qarshi kurashish va majburiy mehnatga barham berish borasida erishgan yutuqlarini alohida ta’kidladi.
O‘zbekiston tashqi ishlar vaziri Vladimir Norov boshchiligidagi delegatsiya 12-dekabr kuni Vashingtonga tashrif buyurgandi. Delegatsiya O‘zbekiston va AQSH o‘rtasidagi strategik sheriklik muloqotining ikkinchi yig‘ilishida ishtirok etadi. Tashrif doirasida Vladimir Norov AQSH davlat kotibi Entoni Blinkendan tashqari mamalakatning boshqa rasmiylari bilan ham muzokaralar o‘tkazadi.
Mavzuga doir: O‘zbekiston AQSH bilan faol va konstruktiv siyosiy muloqotni davom ettiradi
Izoh (0)