O‘zbekistonda yil boshidan beri qancha odam ipoteka krediti olgani ma’lum bo‘ldi
Markaziy bank 2022-yilning 11 oyida aholiga ajratilgan ipoteka kreditlari bo‘yicha ma’lumot berdi.
Unga ko‘ra, aholiga ajratilgan ipoteka kreditlari qoldig‘i 2017-yilga qaraganda 5,8 barobarga ko‘payib, joriy yilda 44,3 trln so‘mga yetgan.
Toshkent shahri 2022-yilda ajratilayotgan ipoteka kreditlari bo‘yicha qolgan viloyatlarga qaraganda bir necha bor oldinda bormoqda — 3,5 trln so‘m. Bu borada 955 mlrd so‘m ko‘rsatkich bilan Samarqand keyingi o‘rinda qayd etilgan.
Kreditlarning 76 foizi yangi qurilgan — birlamchi bozordagi uylarga ajratilgan. Yil boshidan beri 59 mingga yaqin fuqaroga ipoteka kreditlari berilgan.
Kredit rasmiylashtirayotgan mijozlar 58 656 nafar bo‘lsa, ularning 59 foizini erkaklar, 41 foizini ayollar tashkil etgan. Ipoteka kreditlarining asosiy qismini 31-50 yosh oralig‘idagi fuqarolar olmoqda — 70 foiz.
Yil boshidan beri ipoteka kreditlarining moliyalashtirish manbalari:
- Moliya vazirligi — 8,3 trln so‘m;
- Bank o‘z mablag‘lari — 2,9 trln so‘m;
- Ipotekani qayta moliyalashtirish manbalari — 143,1 mlrd so‘m.
Banklar tomonidan ajratiladigan ipoteka kreditlarining o‘rtacha foiz stavkasi yil boshidan beri 1,1 foizga yuqorilab, hozirda 23,5 foiz bo‘lib turibdi.
Yangi tartib doirasida ajratilgan ipoteka kreditlari esa 2022-yilda deyarli o‘zgarmagan — 17,2 foiz.
Avvalroq O‘zbekistonning qaysi hududlarida ko‘proq ipoteka kreditlari berilayotgani haqida xabar berilgandi.
