«Толибон» ва Покистон чегарачилари ўртасида яна тўқнашув бўлиб ўтди (видео)

«Толибон» ва Покистон ҳарбийлари ўртасида Спинболдак—Чаман чегарасида тўқнашув юз берди. Бу ҳақда TOLOnews хабар берди.

Тўқнашув «Толибон» чегара кучлари Дуранд линияси яқинида янги пост қуришни режалаштирганидан кейин бошланган. Қандаҳор губернаторлиги тўқнашувларда «Толибон»нинг бир аъзоси ҳалок бўлгани, 10 нафари эса яраланганини маълум қилди. Покистон томони эса жангда бир аскар жароҳат олганини хабар қилмоқда.

Ўз навбатида, манбалар ушбу тўқнашувда олти киши ҳалок бўлгани ва 25 киши яраланганини таъкидламоқда. Дастлабки ҳисобда яраланганлар 20 кишини, ўлганлар эса беш кишини ташкил қилган. Чегарадади вазият ҳозир нормаллашган. Покистон армияси вазиятни назорат қилиш учун чегара бўйлаб оғир қўшинларни жойлаштирган. Чегарадан савдо қилиш ва одамларнинг ҳаракатланиши тўхтатилган.

Эслатиб ўтамиз, 15 ноябрь куни «Толибон» кучлари ва Покистон аскарлари ўртасида тўқнашув бўлганди. Бир неча соат давом этган тўқнашувда қурбон ёки ярадорлар борлиги эълон қилинмаган. «Толибон» чегара яқинига қўшимча кучлар юборган. 10 ноябрь куни Қандаҳорнинг Спин-болдак шаҳрида «Толибон» кучлари Покистон ҳарбийлари билан тўқнашганди.