Европа Иттифоқи Туркия ҳукуматини Россияга нисбатан савдо сиёсатини ўзгартиришга ва Москвага қарши санкцияларга риоя қилишга чақирди. Бу ҳақда Deutsche Welle хабар берди.
Маълум қилинишича, Украинадаги уруш бошланганидан бери Туркия Россия билан савдо алоқаларини кенгайтирган.
«Туркиянинг Россияга қарши Европа Иттифоқига қўшилмаслик сиёсати тобора хавотирга сабаб бўлмоқда», — дейди Евроиттифоқнинг ташқи ишлар ва хавфсизлик сиёсати бўйича олий вакили Жозеп Боррел.
Уруш фонида Туркия Россияга маҳсулот экспортини ҳам, Москвадан нефть сотиб олишни ҳам кескин оширган. Боррелл Анқарага ЕИ билан тузилган божхона иттифоқини ва Туркия Европа Иттифоқига номзод мақомига эгалигини эслатди.
«Европа Иттифоқи барча номзод давлатлардан Россияга қарши кўрилган чораларга риоя қилишни кутади», — деди у.
Туркия президенти Ражаб Тоййиб Эрдўғон ва Россия президенти Владимир Путин август ойида иқтисодий ҳамкорликни янада кенгайтиришга келишиб олган. Ғарб компаниялари ўз товарларини Туркия орқали Россияга сотишда давом этаётгани айтилмоқда. Шу сабабдан АҚШ маъмурияти аллақачон Туркияга иккинчи даражали санкциялар билан таҳдид қилган.
Мавзуга доир: Европа Иттифоқи Россияга қарши тўққизинчи санкциялар пакети устида ишламоқда
Изоҳ (0)