Беларуснинг Полонка темир йўл станциясига (Брест вилояти, Баранович тумани) Россия Қуролли кучлари техникаси ортилган навбатдаги эшелон етиб келди. Бу ҳақда «Беларуски Гаюн» мониторинг гуруҳи хабар берди.
Экспертлар қайд этишича, вагонлар Москва вилоятидаги Селятино станциясидан етиб келган, платформаларда 15 дан ортиқ бензовоз, камида бешта «КамАЗ», учта Урал ва БТР-80А ташиб келтирилган. Шунингдек, вагонлардан учтаси юк вагонлари бўлган.
«Полонка темир йўл станцияси Обуз-Лесновский полигонига бевосита яқинлигини ҳисобга олсак, техника ушбу полигонда машқ қилаётган Россия Қуролли кучлари аскарларини таъминлаш учун келганини айтиш мумкин», — дейилади хабарда.
10 октябрь куни Беларусь президенти Александр Лукашенко россиялик ҳамкасби Владимир Путин билан «Иттифоқ давлати ғарбий чегараларидаги кескинлик сабабли» минтақавий қўшинлар гуруҳини кучайтириш ҳақида келишиб олганини маълум қилди.
15 октябрь куни эса минтақавий қўшин гуруҳларининг россиялик ҳарбийлардан иборат дастлабки эшелонлари Беларусга етиб келди. Кейинроқ эса тўққиз мингга яқин Россия ҳарбийлари қўшма қўшинлар гуруҳини жойлаштириш доирасида Беларусга етиб келиши маълум қилинди.
Аввалроқ Беларусь Мудофаа вазирлиги қуролли кучларнинг жанговар тайёргарлиги бўйича машғулотлар бошлаган эди. Маълум қилинишича, машғулотлардан кўзланган мақсад қўшинларнинг жанговар ва сафарбарлик тайёргарлигини талаб даражасида текшириш, ҳарбий қўмондонлик ва назорат органларининг ҳамжиҳатлигини оширишдан иборат. Бундан ташқари, Беларусь ҳарбийлари қўмондонларнинг амалий кўникмаларини ошириш ва шахсий таркибни турли шароитларда ҳаракат қилиш учун тайёрлашни режалаштирмоқда.
Изоҳ (0)