НАТО бош котиби Йенс Столтенберг Украинадаги уруш Шимолий Атлантика альянси ва Россия ўртасидаги низога айланиб кетиши мумкинлигини маълум қилди. Бу ҳақда у Норвегиянинг НРК телеканалига берган интервьюсида айтиб ўтди.
«Украинадаги уруш даҳшатли, у тўлиқ кўламли урушга айланиб кетиши, у эса, ўз навбатида, НАТО ва Россия ўртасида катта урушни келтириб чиқариши мумкин. Биз мана шу нарсага йўл қўймаслик устида ҳар куни ишлаяпмиз», — деди Столтенберг.
Шунингдек, у Украинани қўллаб-қувватлашдан «чарчаган»ларни «тушуниши»ни айтиб, озиқ-овқат ва ёнилғи нархи ошиб кетганидан норозилик билдирган, аммо, унинг фикрича, агар Владимир Путин Украинадаги урушда ғолиб бўлиб, бу мамлакатлардаги озодлик ва тинчликни хавф остига қўядиган бўлса, Ғарб «бундан анча каттароқ ҳақ тўлаши»га тўғри келади.
9 декабрь куни Владимир Путин Россия, худди АҚШ каби, ўз ҳарбий доктринасига превентив қуролсизлантирувчи ядро зарбасини киритиши мумкинлигини айтди.
НАТО ва Россия ўртасидаги уруш хавфи ҳақидаги гап-сўзлар Украинада уруш бошланганидан буён давом этиб келмоқда. Шундай хавф туфайли, Ғарб мамлакатлари Киевнинг ҳаво ҳудудини ёпиш ҳақидаги илтимосига рад жавобини берди, шунингдек, қурол-яроғ етказишни чеклади. Россия расмий шахслари НАТО аслида низода Украина томонида туриб қатнашаётганини мунтазам даъво қилиб келади.
Ноябрь ўрталарида Польшага ракета қулаб, икки киши ҳалок бўлганидан кейин НАТО ва Россия ўртасидаги уруш юзасидан хавотирлар кучайди. Дастлаб ракета Россия томонидан учирилгани ҳақида хабарлар пайдо бўлди, кейинроқ Ғарбдагилар у Украина ҳаво ҳужумига қарши мудофаа тизими ракетаси бўлганини маълум қилди.
Изоҳ (0)