Олмалиқдаги корхона 5 мингга яқин хонадоннинг бир кунлик истеъмолига тенг газдан ноқонуний фойдалангани аниқланди
Тошкент вилоятининг Олмалиқ шаҳридаги «Олмалиқ ғиштчи» МЧЖга қарашли ғишт ишлаб чиқариш заводи 10 кун ичида 5 мингга яқин хонадоннинг бир кунлик истеъмолига тенг миқдордаги табиий газдан ноқонуний фойдалангани аниқланди. Бу ҳақда Энергетика вазирлиги матбуот хизмати хабар берди.
Қайд этилишича, ушбу ҳолат энергетика вазири бошчилигидаги махсус штаб томонидан 8 декабрдан 9 декабрь кунига ўтар кечаси Тошкент вилоятидаги юридик истеъмолчиларнинг табиий газдан фойдаланиш ҳолати бўйича ўтказган тунги назорат тадбири давомида аниқланган.
Ўрганиш давомида маълум бўлишича, ғишт ишлаб чиқариш заводи газ таъминоти ташкилоти томонидан 2022 йилнинг 29 ноябрида газ тармоғидан ажратилганига қарамасдан, ўзбошимчалик билан тармоққа ноқонуний уланиб табиий газдан фойдаланиб келган.
Корхона томонидан ноқонуний фойдаланилган табиий газ ҳажми 118 минг куб метрни ташкил этади. Ушбу ҳажмдаги табиий газ 5 мингга яқин ҳовли хонадоннинг куз-қиш мавсумида бир кунлик истеъмолини ташкил қилади.
Ҳолат юзасидан барча ҳужжатлар қонуний чора кўриш учун Олмалиқ шаҳар прокуратурасига топширилган. Ҳозирда дастлабки суриштирув ишлари олиб борилмоқда.
Ҳудудлар бўйлаб назорат тадбирлари давом эттирилмоқда.
«Ҳудудгазтаъминот» раҳбари Баходир Эшмуратов айни пайтда барча кучлар аҳолига газ етказиб беришга сафарбар қилинганини, аҳолига йўналтириш учун қурилиш материаллари ишлаб чиқарувчи корхоналарга табиий газ етказилиши тўхтатилганини айтганди.Мавзуга доир:
- Ўзбекистонда давлат ташкилотлари машиналарига газ қуйиш вақтинча тақиқланди
- Ўзбекистонда электр ва газ муаммоларини тезкор ҳал қилиш учун 24 соат ишлайдиган штаблар ташкил этилади
- «Метан газ қуйиш шохобчаларининг аниқ иш вақти бор, лекин ўзгаришлар киритишга мажбур бўляпмиз» — энергетика вазири
