“Metan gaz quyish shoxobchalarining aniq ish vaqti bor, lekin o‘zgarishlar kiritishga majbur bo‘lyapmiz” — energetika vaziri

O‘zbekiston bosh vaziri o‘rinbosari — energetika vaziri Jo‘rabek Mirzamahmudov energiya ta’minotidagi uzilishlar yuzasidan jamoatchilikka murojaat qilib, holatga izoh berdi.

Metan gaz quyish shoxobchalarining aniq ish vaqtini e’lon qilish mumkinmi?

— Albatta, buning aniq ishlash vaqti yoki cheklov payti bo‘yicha ish olib boryapmiz. Kelishilgan grafiklar mavjud. Ammo iste’molning keskin oshishi oqibatida har bir hududning o‘z xususiyatlaridan kelib chiqqan holda mahalliy hokimiyat vakillari bilan birgalikda hududiy korxonalarimiz birgalikda ishlab, “ruchnoy rejim”da boshqarib turilibdi.

Kunduz kunlari asosan soat 15:00 dan boshlanyapti o‘chirishlar. Sababi kechki payt soat 6, 7 da — odamlar ishdan qaytayotgan, ovqat pishirayotgan vaqtda trubalarda yetarli gaz zaxirasini shakllantirish, bosimni ushlab qolish maqsadida shunday yo‘l tutyapmiz.

Ertalabki iste’mol oshgan vaqtda ham xuddi shunga moslab gaz shoxobchalari faoliyatiga cheklov kiritilyapti. Aniq grafiklar bo‘lsa-da, ularga ayrim hollarda kunbay o‘zgarishlar kiritilishi mumkin, — deydi vazir.

Avvalroq vazir O‘zbekistonda yanvardagi kabi blekaut takrorlanishi mumkinligi haqida ma’lumot bergandi. Shuningdek, O‘zbekiston, Qozog‘iston va Rossiya o‘rtasida gaz ittifoqi tashkil etish uchun sun’iy taqchillik yaratilayotgani to‘g‘risidagi mish-mishlarga ham munosabat bildirib o‘tilgan.