7 декабрь куни Евроиттифоқ мамлакатлари вакиллари ўртасидаги учрашув чоғида Венгрия томони Россияга қарши санкцияларнинг янги пакетига қарши чиқди, шунингдек, Украинага қурол-яроғ тақдим этиш учун фондни икки баравар кўпайтириш ҳақидаги таклифни қўллаб-қувватлашдан бош тортди. Бу ҳақда Financial Times нашрининг Брюсселдаги манбалари маълум қилди, улар Венгрия Евроиттифоқнинг 27 та аъзо мамлакатнинг умумий розилигини талаб этувчи барча қарорларини атайлаб тўхтатиб қўйганини таъкидлади.
«Брюссель Венгрияга пандемиядан кейинги қайта тикланиш учун 5,8 миллиард доллар ҳажмидаги молиявий кўмак ва Евроиттифоқдан бошқа маблағлар яқин орада келиб тушмаслигини маълум қилди. Бунга жавобан у ўзида бўлган энг кучли қуролни ишга солади: Евроиттифоқнинг барча 27 та аъзо давлат розилигини талаб этувчи ҳар қандай қарорига вето қўйиш», — дея FT Будапештнинг сиёсатини тушунтириб берди.
Нашр суҳбатдошлари аниқлик киритишича, улар Венгрия Евроиттифоқнинг Украина мавзусига алоқадор бўлмаган қонунчилик ташаббусларига нисбатан шундай ёндашувни давом эттиришини кутмоқда. «Радикал қадамларни кутишимиз лозим, бунга тайёр бўлишимиз керак», — деди юқори мансабли европалик дипломат.
6 декабрь куни Венгриянинг позицияси туфайли, Евроиттифоқ мамлакатлари Украинага 18 миллиард евролик ёрдам пакетини келишиб ололмади Венгрия томони Украинада жанговар ҳаракатлар бошланганидан буён шундай сиёсий йўналишга риоя қилиб келмоқда.
Изоҳ (0)