Google 2022 йилда энг кўп қидирилган сўзларни эълон қилди. Украина — учинчи ўринда

Google корпорацияси ўз қидирув тизимида 2022 йилда бутун дунё бўйича энг кўп берилган сўровлар рўйхатини эълон қилди.

Энг оммабоп сўров — Wordle бўлди. У ҳар куни янгиланадиган ўйин бўлиб, унда бешта ҳарфдан иборат сўзни топиш керак бўлади. Иккинчи ўринда «Индиа вс England» сўрови жойлашди, у ёзда, крикет бўйича жаҳон чемпионатининг ярим финал ўйини чоғида трендга чиққан. Глобал сўровлар рўйхатида учинчи ўринни Украина эгаллади.

Шунингдек, Украина «Янгиликлар» йўналишидаги сўровлар ичида биринчи ўринга чиқди. Иккинчи ўринда эса Буюк Британия қироличаси Елизавета II нинг ўлими, учинчи ўринда — АҚШда ноябрдаги оралиқ сайловлар натижалари жойлашди.

«Одамлар» категорияси бўйича сўровлар ичида актёр Жонни Депп биринчи ўринни эгаллади, у бу йил собиқ рафиқаси Эмбер Хёрд (у шу категорияда учинчи ўринда) билан судлашиб, ютиб чиққанди. Иккинчи ўринни эса актёр Уилл Смит эгаллади, у «Оскар» маросимида рафиқасининг соч турмаги ҳақида ҳазил қилган қизиқчи Крис Рокка мушт туширганди. Тўртинчи ўринда Россия президенти Владимир Путин жойлашди.

Google фойдаланувчилари спортчилар орасида теннисчи Новак Жоковични, фильмлар ичида «Тор: Муҳаббат ва яшин»ни, сериаллар орасида эса «Эйфория»ни энг кўп қидирган.