Парҳезшунослар таъкидлашдан тўхтамайди: озиқ-овқат маҳсулотларини зарарли ёки фойдали турга бўлиб бўлмайди, бу билан овқат ҳазм қилиш тизимига зарар етказиш мумкин. Шунчаки ҳар қандай маҳсулотлар ижобий ҳамда салбий хусусиятларга эга, деб ёзади «Woman.ru».
Озиқ-овқатларни танлаш масаласида организмнинг хусусиятларига эътибор қаратиш ва мутаносиблик ҳиссини эслаб қолиш керак. Қуйида вазн ортишига ва касалланишга сабаб бўладиган зарарли одатлар билан танишиб чиқиш мумкин.
Жуда тез овқатланиш
Агар шошқалоқлик билан овқатланилса, унда ошқозон билан боғлиқ муаммолар бошланиши мумкин. Бундан ташқари, жуда тез овқатланадиган одамлар овқат ҳазм қилиш жараёнини бузади, натижада улар керак бўлганидан кўпроқ нарсани истеъмол қилади, мия ошқозондан тўқлик ҳақидаги маълумотни олишга улгурмайди. Овқатланиш пайтида тўқлик ҳисси тахминан 15-20 дақиқадан сўнг пайдо бўлади.
Нонуштани истеъмол қилмаслик
Нонуштани ўтказиб юбориш одати хотира ва ақлий қобилиятга путур етказади. Бу куннинг қолган қисмини энергия билан таъминлайдиган эрталабки овқат. Бундан ташқари, агар тушликкача оч юрилса, кун давомида жуда кўп овқатланиш хавфи пайдо бўлади. Шунинг учун, нонушта қилиш шарт ва тўйимли овқатларни истеъмол қилиш яхшидир.
Кечки овқатни кўп истеъмол қилиш
Кечқурун турли сабабларга кўра ортиқча овқатланиш мумкин. Кимдир кун давомида одатдагидек овқатланишга улгурмайди, кимдир стрессни бошдан кечиради. Бироқ жуда кўп овқат истеъмол қилинса, уйқу билан боғлиқ жиддий муаммоларга дуч келиш мумкин ва эрталаб чарчоқ пайдо бўлади.
Шунинг учун кечқурун ортиқча овқатланмасликка ҳаракат қилиш лозим. Аммо оч қолиш керак эмас — кечки овқатни ўтказиб юбориш нонушта қилмаслик каби ёмон фикрдир. Шунинг учун енгилроқ ва паст калорияли овқатлар тановул қилиш керак. Ётишдан олдин олма ейиш тавсия этилади: бу билан кўпроқ витамин ва ичаклар учун фойдали бўлган клетчаткаларни қабул қилиш мумкин.
Овқатдан кейин чекиш
Принципиал жиҳатдан чекиш жуда зарарли, аммо овқатдан кейин чекиш икки баравар зарарли. Олимлар кечки овқатдан кейин чекилган битта сигарет бир нечта сигаретга тенг эканини аниқлади.
Оз сув ичиш
Кўпроқ сув ичиш тавсиялари барчага маълум. Сувсиз одам омон қололмайди, сувсизланиш саломатликка зарар. Агар сув жуда оз ичилса, чарчоқ пайдо бўлади, бош оғриғи кузатилади ва ич қотиши безовта қила бошлайди.
Кўп қаҳва ичиш
Олимлар бу ичимликнинг организм учун жуда кўп фойдали хусусиятлари борлигини аниқлаган. Бироқ меъёрни эсдан чиқармаслик керак: кунига беш ёки ундан ортиқ стакан қаҳва ичиш юрак-қон томир тизимига зарар етказади.
Дам олиш кунларида ортиқча овқатланиш
Баъзи одамлар шундай парҳезга риоя қилади: улар иш ҳафтаси давомида ўзларини ҳамма нарсадан чеклайди, кейин эса дам олиш кунлари кетма-кет ҳамма нарсани паққос туширади. Бироқ бу ёндашув парҳезни бузади ва организмга зарар келтиради.
Ёмон кайфиятда овқатланиш
Инсон ҳаёти, афсуски, у ёки бу тарзда доимий стресс билан боғлиқ. Кўпчилик салбий ҳис-туйғуларни бошдан кечирмасликка, балки уларни эгаллаб олишга ҳаракат қилади. Бироқ ҳар бир ёмон кун туфайли ортиқча ширинлик истеъмол қилиш керак эмас. Биринчидан, стресс билан курашишнинг бошқа усуллари мавжуд. Иккинчидан, бундай вақтда чипс ёки ширинлик эмас, мевалар истеъмол қилиш мумкин.
Жуда кўп шакар истеъмол қилиш
Бу шакарни бутунлай рациондан чиқариш керак, дегани эмас. Шакар жуда кўп истеъмол қилинса, семириш, кариес ва қандли диабет ривожланиши хавфи ортади.
Гаджетлардан фойдаланган ҳолда овқатланиш
Севимли сериал садолари остида овқатланасизми? Ҳатто тушликда ҳам янгиликларни ўқиб турасизми? Бу соғлом одат эмас: чунки бу жараёнда керагидан кўп овқатланганликни сезмаслик мумкин. Шунинг учун овқатланиш жараёнида чалғитувчи нарсалардан чекланиш керак.
Изоҳ (0)