Қирғизистон ва Ўзбекистон чегарани кесиб ўтишда паспорт назоратини енгиллаштиришга келишиб олди. Бу ҳақда 24.kg хабар берди.
Маълумот Жогорку Кенешнинг Халқаро ишлар, мудофаа, хавфсизлик ва миграция қўмитаси йиғилишида ташқи ишлар вазири ўринбосари Айбек Ортиқбоев томонидан эълон қилинган. Унга кўра, эндиликда икки давлат фуқаролари ID-картасини кўрсатиш орқали чегарадан ўтиши мумкин.
«16 ёшгача бўлган фуқаролар чегарани кесиб ўтишда паспорт кўрсатади. Тегишли протокол Ўзбекистон президентининг 9 декабрь куни Қирғизистонга давлат ташрифи чоғида имзоланади», — дейди вазир ўринбосари.
Таъкидланишича, Қирғизистон халқаро ишлар, мудофаа, хавфсизлик ва миграция қўмитаси Ўзбекистон билан мазкур келишувни қўллаб-қувватлади.
Эслатиб ўтамиз, аввалроқ Садир Жапаров Ўзбекистон билан чегара битимини ратификациялаш тўғрисидаги қонунни имзолаганди. 17 ноябрь куни Жогорку Кенеш Ўзбекистон билан Қирғизистон-Ўзбекистон давлат чегарасининг айрим участкалари тўғрисидаги битимни ратификация қилган. Йиғилишда президент Садир Жапаров ҳам иштирок этган. Ратификацияни 64 нафари депутат ёқлаган, 19 нафари эса қарши овоз берган.
Изоҳ (0)