Тарихда биринчи марта аёл киши Samsung компаниясида президент лавозимини эгаллади

Samsung Electronics компаниясининг глобал маркетинг бўйича янги президенти Ли Ён-Хи бўлди. Yonhap хабар беришича, Жанубий Корея технологик гиганти ўз тарихида биринчи марта бундай юқори раҳбарлик лавозимига аёл кишини тайинлаган.

Мутахассис Samsung’нинг Device eXperience (DХ) бўлинмаси Халқаро маркетинг марказига бошлиқ бўлди, ушбу бўлинма компаниянинг смартфонлар ва портатив электроника соҳасидаги бутун бизнесини назорат қилади.

Ли Ён-Хи Samsung’га 2007 йилда келиб қўшилган, унгача L’Oreal компаниясида ишлаган, 2012 йилда эса вице-президент лавозимини эгаллаган. Жанубий Корея компаниясининг смартфонлар ва планшет компьютерлари оиласидан иборат Samsung Galaxy бренди имижининг яратилиши ва муваффақиятли реклама қилинишида айнан у асосий роллардан бирини ўйнагани айтилади.

Yonhap ёзишича, унинг бу лавозимга тайинланиши Samsung’нинг бошқа истеъдодли ходималари учун «сигналга айланиб, уларни карьера зинасидан кўтарилишга даъват этиши» мумкин.

Ли Ён-Хи октябрь ойида компаниянинг етакчиси Ли Же Ён унинг директорлар кенгаши раисига айланганидан кейин юз берган ички тайинловлар натижасида ўз лавозимларини эгаллаган етти нафар Samsung президентларидан бирига айланганди.