Якунланган ҳафта ижтимоий тармоқ фойдаланувчилари ҳамда жамоатчилик ёдида Ортиқхўжаевнинг 100 миллион доллар сўрашда айблангани-ю, Андижон вилояти ҳокими Шуҳрат Абдураҳмоновнинг қурувчиларни ногиронлик аравачасига миндириб, иш сифатини текшириб кўргани билан ёдда қолди. «Дарё» якунланган ҳафтанинг энг шов-шувли воқеаларини ёдга олишда давом этади.
Minerva City лойиҳасининг якунига етмай қолиши билан боғлиқ шов-шувларни изоҳлаган ҳиндистонлик инвестор Мурали Лал Жалан «Kun.uz»га берган интервьюсида лойиҳанинг якунига етмай қолиши Тошкент шаҳри ҳокими билан келишмай қолганида эканини айтган.
Маълум бўлишича, 2018 йилнинг 28 сентябрь куни MJ Developers Ўзбекистон ҳукумати билан 100 миллион долларлик сармоя шартномасини имзолаб, ўзининг 4 та йирик лойиҳасига сармоя киритишни бошлаган. Дастлаб Бухорода 5 юлдузли меҳмонхона қурилиши, кейинроқ Наманганда Namangan Square, Тошкентда Minerva City «ақлли» шаҳарчалари ҳамда Бектемир туманида Lake City сунъий кўли қурилиши бошланган.
Ҳозирда Бухоро ва Намангандаги ишлар муаммосиз давом этмоқда. Лойиҳанинг бир қисми ҳисобланган халқаро университет биносининг тамал тошини қўйиш маросимида пойтахт ҳокими Жаҳонгир Ортиқхўжаев ҳам қатнашиб, лойиҳа барча учун оламшумул бўлиши, бу жараёнда сармоядорларга ҳар тарафлама ёрдам берилиши ва уларга имкониятлар очиб берилишини айтганди. Орадан салкам 3 йил вақт ўтди. Ҳудудда турар жой мажмуаларининг бир қисми бунёд этилди. Аммо ҳозирга келиб ишлар тўхтаб қолган.
2021 йил март ойида Жаҳонгир Ортиқхўжаев мени ҳокимлик биносига чақириб, шантаж йўли билан қўпол муомала қилди. Менга иккита та йўл қолдиришди: ё лойиҳаларимдан бирини, масалан, Бектемир туманида жойлашган Lake City’ни амалга оширишдан расман воз кечишим, ё 100 миллион долларни депозит сифатида банкка жойлашим керак эди. Мен ҳокимга келишувдан ташқари ҳеч ким янги талаблар қўймаслигини, тадбиркор сифатида 7 йил ичида сарфланиши керак бўлган пулни кимнингдир ҳожати учун олдиндан ўтказиш қийинлигини тушунтирдим.
Аммо ҳоким агар ўз хоҳишим билан шу ишдан бирини қилмасам, Minerva City’ни ҳам, қолган барча лойиҳаларим ҳам олиб қўйилишини ва Ўзбекистонда кун кечиришим қийин бўлишини айтди. Бошида шартномани имзолаётганимизда, барча келишувга амал қилиниши ва мажбуриятлар бажарилиши ваъда қилганди, энди эса ҳоким бу мамлакатда шартномалар ҳеч қандай рол ўйнамаслигини таъкидламоқда, — деганди.Мазкур айбловларга жавоб берган пойтахт ҳокимлиги ахборот хизмати буни давлат хизматчисини обрўсизлантиришга уриниш дея баҳолади. Бироқ, ҳокимлик айни кунга қадар мазкур айбловларга жўяли жавоб бермади.
Андижон вилояти ҳокими Шуҳрат Абдураҳмонов Қозоғистонлик раҳбарлар ишини такрорласа-да, жамоатчилик олқишига сабаб бўлди.
Аввалроқ ижтимоий тармоқларда Қозоғистондаги раҳбарлар қурувчилар томонидан амалга оширилган ишлар сифатини текшириш мақсадида ногиронлик аравачасига ўтириб, қурувчилар томонидан ногиронлиги бор фуқароларга қандай имконият яратилганини текшириб кўргани акс этган видеолар тарқалганди. Андижон вилояти ҳокими Шуҳрат Абдураҳмонов ҳам вилоятда қурилган янги кўп қаватли уйларга кириб-чиқишда, шунингдек, уйлар атрофидаги йўлакчаларда ногиронлик аравачасида ҳаракатланиш қанчалик қулай эканини текширишга уринди ва қурувчиларни ногиронлик аравачасига ўтказиб, янги қурилган йўлаклардан юргизди. Бироқ, қурувчилар соғлом бўлса-да, ногиронлиги бор фуқаролар учун ўзлари қурган йўлаклардан юриб ўтолмади. Андижон ҳокими бу ҳолатни кўргач, қурувчилар ишини талабга жавоб бермайди деди.
Ўтган ҳафтада шунингдек, Наманган вилоятининг Учқўрғон туманида кўмирга навбатга турганлар видеоси тарқалиб, жамоатчилик муҳокамасига сабаб бўлди. Ижтимоий тармоқ фойдаланувчилари газ йўқ, свет йўқ, энди кўмир сотиб олишимизда ҳам муаммоми дея эътироз билдирди. Шу куннинг ўзида вилоят ҳокими муаммо юзага келган жойга борган ва мутасаддилар билан бу борада суҳбатлашган.
Якунланган ҳафта бошида Бухоро вилояти суди Қорақалпоғистоннинг Нукус шаҳридаги тартибсизликларда айбланаётганлар ишини кўриб чиқишни бошлади.
2022 йилнинг 28 ноябрь куни Бухоро вилояти судида Қорақалпоғистон Республикаси судининг Жиноят ишлари бўйича судлов ҳайъати Нукус воқеаларида айбланаётганлар ишини кўриб чиқишни бошлади. Олий суд матбуот хизмати давлат айбловчиси томонидан ўқиб эшиттирилган айблов хулосасининг қисқача мазмуни билан таништириб, ким нимада айбланаётганига аниқлик киритди. Шунингдек, суд жараёнида Нукусдаги тартибсизликлар пайтида қанча зарар етказилгани маълум бўлди.
Ажабланарлиси, судда Даулетмурад Тажимуратовни елкасида кўтариб, Жўқорғи Кенгесга олиб борган ва унинг Жўқорғи Кенгес раиси бўлиши кераклигини талаб қилган судланувчи Тажимуратовни жиноятчи ва фирибгар деб атади. Журналист Лолагул Қаллиханова эса унинг чақириқлари сабаб одамлар кўтарилишини билганини, аммо бу даражада уруш бўлади деб ўйламаганини қўшимча қилди ва айбига тўлиқ иқрорлик билдирди. Қолаверса, у Нукус воқеаларининг келиб чиқишига Жўқорғи Кенгес депутатларининг пассив ишлаганини сабаб қилиб кўрсатди. «Жўқорғи Кенгес депутатлари халқ билан мулоқот қилганида бу воқеалар келиб чиқмасди», — деди у. Яна бир судланувчи эса Нукус воқеаларига Даулетмурад Тажимуратов ва Лолагул Қаллиханова айбдор деб чиқди. Бунга жавобан эса кейинги суд мажлисида Даулетмурад Тажимуратов одамлар ўлимида ўзини айбламаслигини билдирди.
Изоҳ (0)