Ўзбекистоннинг қатор ҳудудларида аҳоли газ танқислигидан шикоят қилмоқда

Ўзбекистоннинг қатор ҳудудларида аҳоли газ таъминоти бўйича муаммолардан шикоят қилмоқда. Facebook’даги «Potrebitel.uz» гуруҳига 3 декабрь куни фуқаролардан бир неча мурожаатлар келиб тушган.

Унда айтилишича, айримларда газ умуман бўлмаган, айримларида унинг босими пастлигидан чой қайнашини ҳам ярим соатлаб кутишган. Газ таъминотидаги муаммолар ҳақида Самарқанд, Қўқон, Сирдарё, Тошкент шаҳри ва вилояти аҳолиси хабар берган.

Хусусан, Тошкент вилоятида бундай мурожаатлар Янгийўл, Зангиота, Ғзалкент, Чирчиқ, Барданкўл, Чорвоқ ва Бўстонлиқ қишлоқларидан келиб тушган. Тошкент шаҳрида Шайхонтоҳур, Мирзо Улуғбек, Яшнобод, Яккасарой, Миробод, Сегели туманларидан шикоятлар бўлган. Юнусобод ва Бектемир туманларидан газ таъминоти борасидаги мурожаатлар нисбатан камроқ бўлган.

Энергетика вазирлиги газ конларида табиий газ захираларининг камайиб бораётгани сабабли мамлакат ҳудудларидаги газ конларида режага нисбатан суткасига ўртача 7 фоизга кам табиий газ қазиб чиқарилаётганини маълум қилганди.

Бугунги кунда кўрилаётган чораларга қарамасдан, ҳаво ҳароратининг кескин совиб кетиши сабабли қувурларда газ босимининг пасайиши кузатилмоқда. Қазиб чиқарилаётган табиий газ тўлиқ ички истеъмол учун, хусусан, аҳоли ва ижтимоий соҳа объектлари ҳамда иссиқлик электр станцияларига йўналтирилмоқда, — дейилган эди вазирлик ахборотида.

Мавжуд газ конларида табиий газ қазиб чиқариш ҳажмлари йилдан йилга камайиб бораётгани кузатилмоқда. 2021 йилда белгиланган режага нисбатан 229 миллион метр куб кам табиий газ қазиб чиқарилган бўлса, 2022 йилнинг 11 ойида режага нисбатан 5,8 фоизга кам табиий газ қазиб чиқарилди.

Иқтисодчи Абдулла Абдуқодиров ҳам бу муаммони танқид қилиб чиқди.

Айнан шундай бўлишини мен анчадан бери гапириб келаётган эдим. Қишда қандай чоралар кўриш мумкин газ қазиб олиш ҳажмини оширишга? 7-8 ой иссиқ кунларда нима билан шуғулландинглар? Атайлаб ҳаммани бурчакка тақаб, импорт қилинадиган газни ягона чора қилиш биланми? Атайлаб ҳукуматни мажбурлаяпсизларми?! Молия вазири нега фақат субсидия тўлаш билан банд?! Нега соҳани ичига кирмайди? Нега ички ишлаб чиқаришни ошириш ишларини йил бошидан амалга оширмайди? Эссиз халқим, эссиз давлат қудрати!, — деб ёзган у Facebook’даги саҳифасида.

Қайд этиш лозим, сўнгги кунларда Ўзбекистонда ҳаво ҳарорати пасайиб бормоқда.  Навоий вилояти  «Оқбайтал» кузатув станциясида 4 декабрь эрта тонг ҳаво ҳарорати минимал қиймати нақд 20 даража совуққача пасайди. 5 декабрдан сўнг жойларда ҳаво ҳарорати янада пасаяди.